Молитвы о мире и покое

Молитва пред иконой Божией Матери «Владимирская»

О, Всеми́лостивая Госпоже́ Богоро́дице, Небе́сная Цари́це, всемо́щная Засту́пнице, непосты́дное на́ше упова́ние! Благодари́м Тя о всех благодея́ниих, росси́йским лю́дем от Тебе́ бы́вших, отдре́вле и додне́сь от чудотво́рныя ико́ны Твоея́ явле́нных. И ны́не, Преблага́я Влады́чице, при́зри на ны, гре́шныя и недосто́йныя рабы́ Твоя́, яви́ нам ми́лость Твою́ и моли́ Сы́на Твоего́, Христа́ Бо́га на́шего, о е́же изба́витися нам от вся́каго зла и сохрани́тися ца́рствующим градо́м, вся́кому гра́ду и ве́си, и всей стране́ на́шей, от гла́да, губи́тельства, тру́са, пото́па, огня́, меча́, наше́ствия иноплеме́нник и междоусо́бныя бра́ни. Сохрани́ и умудри́ па́стырей Це́ркве, е́же досто́йно пасти́ ста́до Христо́во и пра́во пра́вити сло́во и́стины; укрепи́ христолюби́вое всеросси́йское во́инство, пода́ждь дух сове́та и ра́зума военача́льником, градонача́льником и всем, иже во вла́сти суть; низпосли́ свято́е Твое́ благослове́ние и всем правосла́вным христиа́ном, покланя́ющимся Ти и моля́щимся пред цельбоно́сною Твое́ю ико́ною. Бу́ди нам Засту́пница и Хода́таица пред Престо́лом Всевы́шняго, иде́же предстои́ши. К кому́ у́бо прибе́гнем, а́ще не к Тебе́, Влады́чице? Кому́ принесе́м сле́зы и воздыха́ния, а́ще не Тебе́, Пресвята́я Богоро́дице? Не и́мамы бо ины́я по́мощи, не и́мамы ины́я наде́жды, ра́зве Тебе́, Небе́сная Цари́це. Под Твой покро́в притека́ем: моли́твами Твои́ми низпосли́ нам мир, здра́вие, земли́ плодоно́сие, возду́ха благорастворе́ние, изба́ви ны от вся́ких бед и скорбе́й, от вся́ких неду́гов и боле́зней, от внеза́пныя сме́рти и от всех озлобле́ний враго́в ви́димых и неви́димых. Вразуми́ и научи́ ны, о Всеми́лостивая Засту́пнице, путь земна́го сего́ жития́ безгре́шно прейти́. Ты ве́си не́мощи на́ша, ве́си и согреше́ния на́ша, но и ве́ру ве́си, и упова́ние ви́диши: те́мже да́руй нам исправле́ние грехо́вныя жи́зни и умягчи́ зла́я сердца́ на́ша. Укрепи́ в нас пра́вую ве́ру, вложи́ в сердца́ на́ша дух стра́ха Бо́жия, дух благоче́стия, дух смире́ния, терпе́ния и любве́, в до́брых де́лех преуспе́яние: изба́ви же нас от искуше́ний, от па́губных душевре́дных уче́ний, от неве́рия, развраще́ния и поги́бели ве́чныя. Тебе́ у́бо про́сим, Пречи́стая Влады́чице, и припа́дающе пред свято́ю Твое́ю ико́ною, мо́лимся: умилосе́рдися на ны и поми́луй ны, в Стра́шный же день Суда́ хода́тайством и заступле́нием Твои́м сподо́би ны ста́ти одесну́ю Сы́на Твоего́, Христа́ Бо́га на́шего, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и Пресвяты́м и Благи́м и Единосу́щным Его́ Ду́хом, ны́не и при́сно, и во ве́ки веко́в. Ами́нь.

Молитва пред иконой Божией Матери «Донская»

О, Пресвята́я Влады́чице, Де́во Богоро́дице, Засту́пнице на́ша блага́я и ско́рая! Воспева́ем Ти вси благода́рственная за чу́дная дела́ Твоя́. Песносло́вим от лет дре́вних неотъе́млемое заступле́ние Твое́ гра́ду Москве́ и стране́ на́шей, чудотво́рным Образом Твои́м Донски́м всегда́ явля́емое: в бе́гство обраща́ются полки́ чу́ждих, гра́ды и ве́си невреди́ми сохраня́ются, лю́дие же от лю́тыя сме́рти избавля́ются. Осуша́ются о́чи слезя́щия, умолка́ют стена́ния ве́рных, плач в ра́дость о́бщую претворя́ется. Бу́ди и нам, Пречи́стая Богоро́дице, утеше́ние в бе́дствиих, возрожде́ние наде́жды, о́браз му́жества, исто́чник ми́лости, и в ско́рбных обстоя́ниих неистощи́мое терпе́ние нам да́руй. Пода́ждь коему́ждо по проше́нию и по нужде́ его́: младе́нцы воспита́й, ю́ныя уцелому́дри и стра́ху Бо́жию научи́, уныва́ющия ободри́ и немощну́ю ста́рость поддержи́. Посети́ в боле́знех и печа́лех су́щия, зла́я сердца́ умягчи́, братолю́бие укрепи́, ми́ра и любве́ всех нас испо́лни. Примири́, благосе́рдая Ма́ти, вражду́ющия и оправда́й оклеве́танныя. Истреби́ поро́ки, да не восхо́дят грехи́ на́ша пред Судие́ю вся́ческих, да не пости́гнет нас пра́ведный гнев Бо́жий. Твои́ми моли́твами, всемо́щным Твои́м покро́вом огради́ нас от наше́ствий вра́жиих, от гла́да, губи́тельства, огня́, меча́ и вся́каго ина́го злострада́ния. Упова́ем моли́твами Твои́ми получи́ти от Всевы́шняго Бо́га грехо́в проще́ние и изглажде́ние и с Бо́гом примире́ние. Умоли́ стяжа́ти нам Ца́рствие Небе́сное и по сконча́нии жи́зни на́шея одесну́ю Престо́ла Бо́жия ста́ти, иде́же Ты, о Всепе́тая Де́во, Святе́й Тро́ице в ве́чней сла́ве предстои́ши. Удосто́й и нас с ли́ки А́нгел и святы́х та́мо восхвали́ти пречестно́е и́мя Сы́на Твоего́ со Безнача́льным Его́ Отце́м и Всесвяты́м и Благи́м и Животворя́щим Его́ Ду́хом во ве́ки веко́в. Ами́нь.

Молитва пред иконой Божией Матери «Отчаянных единая надежда»

О, Пречи́стая Влады́чице Богоро́дице! К Тебе́, изнемога́юще от уны́ния и расслабле́ния, и свое́ю со́вестию облича́емыя, в се́рдце сокруше́нном припа́даем и со умиле́нием вопие́м Ти: не отступи́ от нас, многогре́шных, зря́ще безчи́сленныя грехопаде́ния на́ша, и́миже преогорчи́хом Триипоста́снаго Бо́га и Тебе́, Цари́це Небе́сная.

Изба́ви нас, о Засту́пнице на́ша, от привы́чек грехо́вных и пле́на страсте́й, и́миже плени́ли враги́ во́лю на́шу, связа́ли ю кре́пкими пу́тами, понужда́я нас рабо́тати греху́. Мно́жицею приступи́ли мы свои́м хоте́нием за́поведи Творца́ своего́, те́мже и лиши́лися за грехи́ на́ша благода́ти Сы́на Твоего́, е́юже защища́ет Бог лю́бящих Его́ от сете́й лука́ваго. Не има́мы, Влады́чице, сил разреши́тися от ве́рвия сего́ бесо́вскаго. Изнемо́гла бо во́ля на́ша без благода́ти Сы́на Твоего́ и ве́домы е́смы а́може не хо́щем, и я́коже рабо́в свои́х враг понужда́ет ны рабо́тати ему́.

Не оста́ви нас, Всеми́лостивая, без Твоея́ по́мощи, яко не има́мы ины́я наде́жды то́кмо Тебе́, Пренепоро́чная. А́ще не умоли́ши Сы́на Твоего́ поми́ловати ны, вси поги́бнем во гресе́х на́ших. Изведи́ ны от ра́бства сего́ грехо́внаго, бу́ди нам Свободи́тельница и уз бесо́вских Реши́тельница. Просвети́ ум наш, да па́мять има́мы, я́коже вся, я́же суть на земли́, прах и пе́пел есть, наипа́че плоть на́ша, е́йже, я́ко и́долу, понужда́ет ны служи́ти враг.

Пробуди́, Влады́чице, к покая́нию усну́вшую со́весть на́шу, опали́ ю стра́хом предлежа́щаго Стра́шнаго Суди́лища Бо́жия, иде́же отве́т има́мы да́ти о всех деле́х и словесе́х, и помышле́ниих на́ших. Разжжи́ ду́ши на́ша огне́м ре́вности по Бо́зе, его́же в нача́ле возже́г в нас Бог. Мы же дар сей не соблюдо́хом и нераде́нием свои́м погуби́хом; ны́не же, я́ко пять дев юро́дивых сиди́м во тьме́, не иму́щи что возже́щи в сре́тение Жениха́ Христа́.

О, Ма́терь Све́та, Цари́це Небе́сная, Наде́ждо отча́янных и обремене́нных грехми́ мно́гими, ниспошли́ нам по́мощь от Сы́на Твоего́ и Бо́га на́шего, умоли́ Сладча́йшего Го́спода Иису́са Христа́, да не прогне́вается на ны зело́, но изведе́т ны от ра́бства грехо́внаго, да укрепи́т во́лю на́шу благода́тию Свое́ю, я́ко изба́вльшеся Твои́м заступле́нием от се́ти вра́жия, просла́вим в Тро́ице сла́вимаго Бо́га Отца́ и Сы́на и Свята́го Ду́ха во ве́ки веко́в. Ами́нь.

Молитвы пред иконой Божией Матери «Нерушимая стена»

Молитва 1-я

О, благода́тная Влады́чице на́ша Богоро́дице, Присноде́во! Прии́ми от нас сие́ благода́рственное хвале́бное пе́ние и вознеси́ ко Творцу́ и Зи́ждителю на́шему те́плыя моли́твы Твоя́ за нас недосто́йных, да прости́т Он, Милосе́рдый, нам вся грехи́ на́ша, по́мыслы лука́выя и нечи́стыя, дела́ скве́рныя. О, Госпоже́ Пресвята́я! Умилосе́рдися и низпосли́ дар по коего́жде потре́бе: боля́щия исцели́, скорбя́щия уте́ши, заблу́ждшия вразуми́, охрани́ младе́нцы, воспита́й и научи́ ю́ныя, ободри́ и наста́ви му́жи и же́ны, поддержи́ и согре́й ста́рыя, бу́ди нам и зде, и в жи́зни ве́чней Стено́ Неруши́мая, изба́ви от вся́ких бед и напа́стей и от ве́чнаго муче́ния, да всегда́ воспева́юще Твою́ матери́нскую любо́вь, восхваля́ем всем се́рдцем Сы́на Твоего́, со Отце́м Его́ и Святы́м Ду́хом, во ве́ки веко́в. Ами́нь.

Молитва 2-я

И Ты, Влады́чице, не напра́сно имену́емая «Неруши́мой Стено́й», бу́ди для всех вражду́ющих про́тив меня́ и замышля́ющих па́костная твори́ти мне, вои́стину не́коей прегра́дой и неруши́мой стено́й, огражда́ющей мя от вся́кого зла и тя́жких обстоя́ний. Ами́нь.

Молитвы пред иконой Божией Матери «Тучная Гора»

Молитва 1-я

О, всеми́лостивая Влады́чице на́ша Пресвята́я Богоро́дице Мари́е! При́зри на ны погиба́ющия рабы́ Твоя́, бе́хом бо мы ме́рзкия, бе́хом бо мы блу́дныя, бе́хом бо мы злоречи́выя, а па́че всего́ го́рдыя, ны́не же ви́дехом всю ме́рзость на́шу пред очеса́ми Го́спода и уже́ несмь досто́йны предста́ти пред лице́м Его́, и то́кмо Тя Влады́чице, я́ко Многоми́лостивую себе́ Засту́пницу призыва́ем. О Ма́ти Бо́жия, во гресе́х су́щих не оста́ви нас. Наде́ждо на́ша несумне́нная, обнови́ нас в покая́нии, возста́ви ко исполне́нию за́поведей Бо́жиих, учини́ нас в Це́ркве Свя́тей и сотвори́ досто́йными Свята́го Прича́стия Животворя́щим и Боже́ственным и Стра́шным Та́йнам; Ты бо при́сно мо́лиши за ны Сы́на Своего́ и Бо́га, ве́мы я́ко мно́го бо мо́жет моле́ние ма́тернее. И да испроси́ у Христа́ Бо́га здра́вия нам теле́сного, и я́ко Ми́лостивая, облагодати́ ду́ши на́ша, посли́ мир и благо́е поспе́шение всем бли́жним на́шим, при́зри на град наш храни́мый покро́вом Твои́м, ему́же яви́ ско́рое заступле́ние от чудотво́рныя и благоле́пныя святы́я Твое́я ико́ны, ю́же ны́не благода́рне лобыза́ем, и сохрани́ его́ и вся ини́и гра́ди и ве́си и ве́сь род правосла́вный от вся́ких напра́сных бе́дствий; и отрази́ ересе́й наше́ствие от язы́к иноплеме́нных на нас находя́щия, раско́лы разори́, ра́спри и ины́я разделе́ния в Це́ркви Бо́жией, я́ко еле́ем Твои́м целе́бным, любо́вию нелицеме́рной умасти́в, наде́жно упра́ви, да ми́рное и благочести́вое житие́ бу́дет в уде́л нам, и да сподо́бимся до́брыя глаго́лы от Сы́на Твоего́ и Судии́ на́шего слы́шати под Судо́м Его́ пра́вым, Ему́же сла́ва и честь и поклоне́ние со безнача́льным Его́ Отце́м и Всеблагода́тным Его́ Ду́хом ны́не и при́сно и во ве́ки веко́в. Ами́нь.

Молитва 2-я

К Тебе́, Влады́чице, пред ико́ною Твое́ю, во умиле́нии преклони́в вы́ю свою́ го́рдую, взыва́ю: Се аз, гре́шный, от несу́щего к су́щему воззва́н бых, но ско́ро за моя́ безчи́сленныя и ме́рзкия согреше́ния вновь в несу́щее во а́довых бе́зднах обраще́н бу́ду; но из тьмы злово́нныя грехо́в мои́х молю́ся Ти, Преблага́я: спаси́ мя, умоли́ Сы́на Твоего́ пожда́ти па́ки, да не пожре́т мя днесь напра́сныя смерть, и да по вели́цей ми́лости Его́ и при благоприя́тной Твое́й, Пречи́стая, по́мощи, обращу́ся от тьмы к Свету, от самолю́бия к боголю́бию, от неве́рия к ве́ре, от зла ко бла́гу, от богоме́рзости греха́ к преподо́бию; а́ще бо что челове́ку невозмо́жно бысть, то Бо́гу возмо́жно, и да отны́не послужу́ ко прославле́нию Сы́на Твоего́, предадя́ ся всеблаго́й во́ле Его́, да́бы и мне приити́ по Стра́шнем Суди́ще Христо́вом ко благи́м и возлю́бленным о́вцам па́жити Его́ в ра́дость при́сную и жизнь ве́чную. Ами́нь.