La minchületta d'utuon
TextLa minchületta d'utuon
Text: Gildo Brunies
Lectorat: Carla Lozza-Valär, Lozzatext
Illustraziun sülla pagina da titul: Gildo Brunies
Stampa: epubli –
ün servezzan da la ScRL neopubli, Berlin
© 2021 – Tuot ils drets arsalvos
Inhalt
La minchületta d'utuon
La minchületta d'utuon
L'invöl
Ils invidos
Ulteriurs problems
Ün gianter gratagio
Ün arriv cun retard
Ün curius telefon
Las retscherchas cumainzan
Ün amih da l'infanzia
La minchületta d'utuon
Bun da savair
La minchületta d'utuon
Ill'istorgia farost la cugnuschentscha da las seguaintas persunas:
Chatrina Mengiardi invida ün pêr amihs per festager sieu anniversari in Engiadina.
Albert es sieu hom e Gervas sieu figl.
Göri es il guardiaun, Armon il servitur e Rea la chesarina. Els fuorman il persunel da Chatrina.
Pierin Vincenz es il cusdrin da Chatrina e Flurin Caratsch ün amih da Pierin daspö l'infanzia.
Men Duschletta es ün associo dad Albert e sia duonna Silvana es üna bun'amia da Chatrina.
Gianna es eir üna bun'amia da Chatrina e sieu hom, il docter Felix Nuotclà, es ün specialist da nudrimaint.
Linard Rageth es ün tecniker chi'd ho installo ün indriz d'alarm illa chesa dals Mengiardis.
Il signur Clavadetscher es ün meidi d'urgenza.
Il signur Huonder es ün agent da la societed da sgüraunza.
Il cumissari Demarmels e Pius, sieu agüdaunt, prouvan da resolver il cas.
L'invöl
Que es utuon è'l mais d'october s'approsma. Chatrina Mengiardi stüdgia vi dals preparativs per la festa da sieu anniversari.
Scu minch'an fo ella il viedi a Chapella, üna pitschna fracziun da la vschinauncha da S-chanf, inua ch'ella posseda üna bella chesa signurila. Que's tratta d'üna magnifica residenza dal 18evel tschientiner chi tuocha a sia famiglia.
A Chatrina plescha da passanter quindesch dis illas muntagnas, da fer spassagedas tres il god e da tschercher minchülettas d'utuon. Quellas fluors sun sias preferidas, ma in Engiadina sune s-charsas. Minchataunt as chatta ellas in lös sulaglivs u mez sumbrivaints a l'ur dal god. Las spassagedas sun uschè agreablas ed auncha dapü scha's pensa vi da la tschiera giò la Bassa.
Davaunt chesa cultiva Chatrina ün üert cun plauntas specielas e fluors insolitas siand ch'ella cugnuoscha la funcziun da minchüna. Ella las sechainta e prepara excellentas infusiuns. Pavradella, rosmarin, chamanella, estragun, melissa – per Chatrina ho mincha plaunta sieus secrets.
Adonta cha que vo auncha ün'eivna fin ch'ella cumplescha ils ans, voul Chatrina cha la festa saja perfetta: cumanzo tar la decoraziun fin tar la preparaziun dal menü. Normelmaing es que ella chi s'occupa dal menü perque ch'ella es üna fich buna cuschinunza. Impü è'la eir ün osp perfet: sieus giasts sun adüna in buns mauns. Las bellas radunedas l'algordan adüna da sia infanzia cur cha sieu non reuniva a tuot la famiglia per fer grandas festas. Intaunt s'haun las relaziuns müdedas e las occasiuns da festager sun displaschaivelmaing magari reras. Melgrô las circunstanzas nun ho Chatrina mê renunzcho a „l'inscunter“ in october.
Il viedi da Cuira in Engiadina es ieu bain. Pensiva admira ella ün mumaint la cuntredgia paschaivla e las muntagnas chi la peran uschè familieras.
Cur ch'ella riva vain Göri, il guardiaun, our d'chesa a l'artschaiver:
«Allegramaing duonna Mengiardi e bainvgnida in Engiadina», disch el.
Göri es ün pô gniervus, ma Chatrina nu s'inaccordscha d'ünguotta. Ella es cuntainta da finelmaing esser a Chapella.
«Grazcha, Göri. Il sulagl e quista quietezza sun il paradis. Eau m'allegraiva fich da pudair gnir», respuonda ella.
«Duonna Mengiardi, eau d'he üna trista novited: la not passeda haune ruot aint e …»
«Ruot aint? Tü fest be spass, nischi?»
«Melavita na. Pera cha'l sistem d'alarm nu funcziunaiva ed eau am tratgnaiva aint in mia staunza e nu d'he udieu ünguotta. Que'm displescha fich. Hoz in bunura d'he chatto la fnestra da chadafö avierta e la lastra ruotta. Eau d'he dalum penso cha qualchün hegia ruot aint e sun currieu aint in stüva. Lo d'he vis cha maunchan tuot ils ogets d'argient.»
«Ma que nun es pussibel! Hest clamo la pulizia?»
«Schi, duonna Mengiardi, be dalum. In bunura bod sun già gnieus duos pulizists.»
«E che haune dit?»
«Els haun dit ch'Ella dessa ir al cumissariat per purter plaunt e vulaivan savair scha la chesa saja sgüreda.»
«Natürelmaing ch'eau la d'he sgüreda. Eau suppuon ch'eau stögl fer ün'inventarisaziun da tuot que chi'd es gnieu invulo. Mauncha auncha qualchos'oter?»
«Na, ils leders varon gieu temma da gnir surprais ed haun banduno la chesa aunz cu glivrer lur „lavur“.»
«Mia bell'argientaria – quella vaivi fich gugent! Que d'eira part da l'ierta da mieu non barmör. El d'eira uschè ün bunatsch. E cun tuot que ch'el ho stuvieu supporter cun tuot quellas vipras in famiglia!»
«Am displescha fich, duonna Mengiardi. Eau se cha quels ogets la staivan a cour», prouva Göri da la cufforter.
Armon, il servitur e Rea, la chesarina as mettan a lavurer: Rea güda da spaquetter las valischs da la patruna e da metter ils vstieus aint in s-chantschia sün chambra. Armon repassa las provisiuns our in chamineda e prepara ün pitschen gianter. Chatrina es telmaing consterneda ch'ella desista per üna vouta da'l fer svessa.
Ella spetta tuot melpazchainta sün sieu hom Albert chi stuvess gnir zievamezdi. Albert lavura bger e minchataunt stu'l dafatta ir a l'ester per motivs professiunels. El voul tuottüna fer üna posa ed ho decis da passanter ün tempet a Chapella cun sia duonna.
Cur ch'el riva finelmaing al quinta Chatrina dalum da l'invöl.
«Albert, eau sun uschè trista! E dal rest stögli ir al cumissariat. Eau d'he be güst telefono a la sgüraunza. Quels pretendan üna copcha da la denunzcha. Fo il bain e ve cun me.»
«Hei cler mia chera, tü poust fer quint cun me. Ed alura telefoni auncha al tecniker ch'el vain a cumader l'indriz d'alarm. Qualchos'oter: vain Gervas per tieu anniversari?»
«Eau nu se. El m'ho dit ch'el saja fich occupo.»
Gervas, il figl da Chatrina ed Albert, sto a Turich inua ch'el fo crajer da stüdger giurisprudenza. El es ün giuven magari curius, perfin stravagant. El ho 22 ans e per dir la vardet nun ho'l üngüna vöglia da stüdger. Sia paschiun pel teater occupa tuot sieu temp e tuot sieus impissamaints. El giouva in üna pitschna societed da teater e las prouvas sun pü importantas cu ils examens. Pera ch'el es ün excellent actur, ma sieus genituors
preferissan sch'el fess il licenziat. Chi so sch'el vain a la festa da sia mamma? Sgür ch'el varo otras chosas da fer. Ma adonta da tuot so'l precis cha que füss important per sia mamma ch'el vain.