SCENA SECONDA
Donna Rosa – Detti
Tutti
(spuntando donna Rosa in iscena)
È cosa 'e niente! È cosa 'e niente!
Donna Rosa
(allontanando la folla)
Figlio mio! Figlio mio!.. Addo' sta?
Sufia
Nun é niente!
Nunziata
Nun avite appaura!
Donna Rosa
Addo' sta?.. Vito!.. Figlio mio!.. Addo' sta?..
Vito
(dalla bottega)
Sto ccá, sto ccá, sto buono… (esce nella piazzetta)
Donna Rosa
Uh, figlio mio!.. Io mo moro!..
Vito
Io sto buono!.. È stata na cosa 'e niente… Mm'é benuto nu sbenimento…
Donna Rosa
(toccandolo, guardandolo)
Uh, figlio!.. E mò comme staie, comme te siente?.. Vuo' niente?.. Te ne vuo' venì 'a casa?..
Vito
V'aggio ditto ca sto buono, oí ma! È stato affetto 'e debulezza…
Donna Rosa
E bienetenne 'a casa! Te faccio nu poco 'e broro…
Nunziata
Avite visto, ca nun é niente!
Donna Rosa
(a Vito)
Che buo' fa? Vuo' venì 'a casa?..
Vito
Io v'aggio ditto ca nun è niente! Io v'aggio ditto ca sto buono! E mò si nun mme ne vaco dinto mme fenesco 'e attaccà 'a neveratura! (Rientra nella bottega)
Donna Rosa
(a Nunziata)
Ma sta buono o no? Ma che ll'è benuto, se po' sapé, o nun se po' sapé?.. Ma vuie pecché nun mm' 'o vulite di'?
Nunziata
Giesù, niente!
Donna Rosa
(vedendo donna Amalia)
'Onn'Amà?..
Amalia
(fredda, amara)
Ma ched'é, nun 'o ssapite stu figlio vuosto c'ha fatto?
Donna Rosa
(spaventata)
C'ha fatto?.. Ma che mme vulite fa vení na cosa!..
(Le donne fanno segno ad Amalia che taccia)
Amalia
Ha fatto nu voto…
Donna Rosa
(c. s.)
Nu voto?.. Comme?.. E che voto?
Amalia
Stu figlio vuosto caro caro ha fatto 'o voto 'e se spusá na femmena malamente. Chesto ha fatto.
(Le volta le spalle)
Donna Rosa
(atterrita)
Chi?!.. Vuie che dicite!.. Ha fatto 'o voto… Uh, mamma mia! Uh, faccia mia!.. Ah, nun é overo, nun é overo!..
Amalia
(freddamente)
Addimannate…
Donna Rosa
Nunzià?.. P'ammore 'e Dio! Diciteme 'a verità!.. Comme! Vito ha fatto stu voto?.. Sufì, é overo?.. Neh, Assú… diciteme 'a verità!.. Ma é overo?.. Uh! faccia mia! Faccia mia!.. Addo' sta?.. Vito?.. Addo' sta?.. (move verso la tintoria)
Nunziata
(trattenendola)
'Onna Ró, embé? Lassate 'o sta, mo! Cheste so cose ca po' s'acconciano. Mo 'assat' 'o i'…
Sufia
Vuie 'o facite fenì 'e cadé malato!
Donna Rosa
(gridando)
Vuie che dicite? Ma vuie che dicite? Ma vuie avite ntiso chillo c'ha fatto?!.. Comme! A na femmena malamente!.. E sta faccia mia addo' 'a vaco a mettere?.. Uh, mamma mia, e che ddelore ca mme steva astipato a notte a notte!.. (si volta) Neh, 'onn'Amá?.. Vuie che mme dicite?..
Amalia
(incamminandosi verso il vicolo a sinistra)
So' fatte ca nun mm'apparteneno. (Scompare nel vicolo)
Donna Rosa
(correndole appresso)
'Onn'Amá!.. 'Onn'Amá!.. E sentite!.. (La rincorre. Scompare anche lei nel vicolo)
Nunziata
(a Sufia)
Che ve credite ca stu fatto fenesce mo?
Vito
(uscendo in fretta dalla bottega)
Nunziá, mammema addo' é ghiuta?
Nunziata
'A vedite llá, cu donn'Amalia…
Vito
Capite? E chella mm'é mamma!..
Nunziata
Ma mò che bulite fa? Ve vulite pigliá collera n'ata vota? Mò penzate 'a salute e nun ve nn'incarricate. Facite 'e cose revulare, e a chillo bello Giesú nun lle date collera!
Vito
Io mme so' raccummanato a isso (lo guarda, sberrettandosi) e mme pare c'aggio fatto cchiú 'e chello c'aggio pututo. (Si copre) Abbasta ca isso nun mme fa ncuietá 'a nisciuno!.. Pecché io tengo brutte ntenzione!
Sufia
Va buono, non date audienzia 'a gente…
Nunziata
Basta, venimmo a nuie. Avite mannato a accattá 'e ccere?
Vito
Qua cere?
Sufia
'E ccere d' 'o voto.
Vito
E quante ce ne vonno?
Nunziata
Pe revula pe revula ce ne vulessene tre libbre.
Vito
Embé, se piglieno. C'ato ce vò?
Sufia
Duie sciure frische, pe bello vedé…
Vito
E va bene… Che ato?
Nunziata
Avimmo ditto 'e ccere, 'e sciure… Ah!.. Mo' ce scurdavemo 'o mmeglio… E 'a messa pezzuta?
Sufia e Assunta
Uh, overo!
Nunziata
(a Vito)
Sapite c'avite fa? Quann'è dimane susiteve nu poco cchiú ampresso e ghiate addo' rettore 'e Sant'Eliggio. Chillo scenne albante iuorno pe dicere 'a messa, e 'o truvate sicuro. Faciteve dá 'a fiura. Anze, vedite c'ha dda tené pure 'e mmedaglielle.
Vito
Bé…
Nunziata
Mettite 'a fiura int'a na guanterella e ghiate attuorno. Chello che facite…
Sufia
Accattate 'e ccere.
Nunziata
Accatta 'e ccere? Essí! 'E ccere ce l'ha dda mettere isso. (a Vito) Chello che facite serve p' 'e mmesse…
Vito
(a Nunziata)
Diciteme n'ata cosa…
Assunta
'Onna Rosa! 'Onna Rosa!
Nunziata
(a Vito, in fretta)
Iate, ca po' parlammo. (Vito rientra in bottega)
Sufia
Nunziá, stateve bona.
Nunziata
Addo' iate?
Sufia
Mo ce vedimmo… (va via con le altre)
Rabbiele
(martella una suola sul marmo e canta)
«Che passiona che ttengo a stu core! Nennella mia sta bona malata! So' vinte juorne…»
SCENA TERZA
Donna Rosa – Vito – Nunziata – Rabbiele poi Don Marco – poi Donn'Amalia
Nunziata
(a Rosa che si dirizza alla tintoria)
'Onna Ro', ve vulisseve fa sta capa? (sciogliendo il grembiale che ha attorcigliato intorno alla vita)
Donna Rosa
(bruscamente)
Ve ringrazio, Nunzià…
Nunziata
Allora bona sera. Vengo dimane 'a casa… (via per la destra. Il ciabattino seguita a martellare la suola)
Donna Rosa
(siede davanti alla tintoria e s'asciuga la fronte con la pezzuola. S'agita e sbuffa)
Vito
(uscendo sulla soglia della bottega)
Vuie ccá state? (Rosa lo guarda senza rispondere) E nun ve ne iate 'a casa? 'A casa sta sola.
Donna Rosa
Lasse 'a sta sola!
Vito
(la guarda, poi fa spallucce e siede sotto l'arco della porta. Momento di silenzio)
Ch'é stato, neh, mà?
Donna Rosa
Niente.
Vito
Ah, bé… Quanno nun è niente tanto meglio.
Donna Rosa
(scattando)
Ch'é stato? Vuo' sapé pure ch'è stato? É stato ch' 'e' fatto nu bello voto, 'e' fatto! Nu voto ca fa proprio onore a tutta 'a razza nosta!
Vito
Chest'é? Io 'o sapevo.
Donna Rosa
Vi', tu me vuo' fa murí primmo d' 'o tiempo!
Vito
Mme pare ca site vuie ca vulite fa murí a me!
Donna Rosa
No, si' tu ca mme vuo' amariggiá sti poche ate iuorne ca tengo!
Vito
(impazientito)
Site vuie, so' io… Va bene, so' io! So' io, sissignore!.. E nun ne parlammo cchiú!
Donna Rosa
(amara)
Haie raggione! A me chesto mme spetta. Sgarbe e male parole…
Vito
Chesto v' 'o penzate vuie. Io nun v'aggio risposto malamente.
Donna Rosa
E nun me puo' risponnere malamente, 'e' capito? Io te songo mamma e tu nun' 'è 'a sta a sentì a ll'ate; 'e' 'a sta a sentí a me! (si alza)
Vito
Chesto fino a nu cierto punto!
Donna Rosa
No! Fino all'urdemo punto, 'e' capito?.. Senza ca m'accummience a mancá 'e rispetto!
Vito
Oi ma', nun accumminciate a mbrugliá a utile vuosto!.. E nun mme ncuitate!
Donna Rosa
Stu voto levatillo 'a capo! Doppo ca io avesse murí ciente vote e no una, na tale e quale comme a chelle ca vaie truvanno tu, int' 'a casa mia nun ce trase, nun ce trase e nun ce trase! (Urla. A un palazzetto si apre una finestra e una donna si affaccia a udire)
Vito
(alzandosi)
Nu' strellate e nun accuminciammo a fa ll'opera mmiez' 'a strata!
Donna Rosa
Ll'opera 'a vuo' fa tu, e nun fa abbedé ca mo te miette scuorno, famme stu piacere! (S'apre un'altra finestra e s'affaccia un'altra donna)
Vito
(fremendo)
Iatevenne 'a casa!..
Donna Rosa
Mo' mme ne cacce pure?
Vito
Io ve dico iatevenne 'a casa!
Donna Rosa
Mo' mme ne cacce pure! Mo' si tu 'o patrone! Mo' faie tutte cose tu! Mo' cumanne tu! 'A quanno è muorto pateto mme staie ntussecanno 'a vita mia!
Vito
Nu' strellate! 'O bbedite ca facite affaccià 'a gente!
Donna Rosa
(rivolta alle finestre)
Nun hanno a che penzá! Penzassero 'e ccorna lloro ca ne teneno assaie pure lloro! (Le finestre si rinserrano)
Don Marco
(avvicinandosi alla tintoria)
'Onna Ró, venite acca', sentite… (cerca d'allontanarla)
Vito
(di su la soglia della bottega)
Io 'o ssaccio chi v'ha mannato 'a chesti parte! Che ve credite ca nun 'o ssaccio? Ma cu me é tiempo perduto! Hanno muzzecá ccá nfaccia! (Si tocca il gomito) Io faccio chello ca mme pare e piace a me!
Donna Rosa
(urlando)
E fallo, fallo! Chi te dice niente?! Chi vo' niente a te? Fallo! Fallo!
Vito
(urlando anche lui)
E pecché venite ccá bbascio? Pecché ve facite vení tutte sti tirepetirre? Io sto malato!.. Vuie a chi vulite atterrá? Vuie site, ca mme vulite vedé muorto!
Don Marco
Zitto, embé!
Donna Rosa
Io! Io, ové? (al Cristo) Tu 'o siente?
Vito
Sì, sì, vuie proprio! Vuie site stata ca mm'avite fatto accussì! Ca si mm'avisseve fatto e n'ata manera, c' 'a bbona salute, tutto chesto nun succedarria! A chi aggia ringraziá? Nun aggia ringraziá a vuie?
(Le volta le spalle ed entra nella bottega)
Donna Rosa
(rivolta alla bottega, quasi piangendo)
Haie raggione, ossá! Chesto ca mm' 'e' ditto ogge Dio t' 'o pozze perdunà!
Don Marco
Stateve zitta, ca chillo ha pazziato…
Vito
(uscendo sul limitare della tintoria, trattenuto da Rafele e dagli altri garzoni)
E dicite a chella perzona ca v'ha mannato 'a chesti parte, ca se facesse 'o fatto suio, si no io faccio revutá 'o quartiere!
Rafele
Zì, zì!.. Stateve zitto!..
Donna Rosa
(gridando)
'O quartiere 'o faccio revutá io, 'e' capito? Io scuorno int' 'a casa mia nun ne voglio! Nun ne voglio! (Si ricomincia ad affollare la gente)
Don Marco
(a Rosa)
Stateve zitta!
Vito
(a Rosa, minaccioso)
Iatevenne, sì no comm'è bbera 'a iurnata ch'é ogge vuie mme facite fa chello ca nun aggio maie fatto!
Donna Rosa
(convulsa, urlando)
Pecché, che faie? Mme vatte? Mme vulisse pure vattere? E tu vatteme!..
Rabbiele
(frapponendosi, a Vito)
E quanno ve ne iate 'a parte 'e dinto?
Don Marco
(a donna Rosa)
Iammuncenne… (cerca di condurla via)
Donna Rosa
Lassateme, 'on Má! Vuie 'o bbedite a che simmo arrivate! Nu figlio c'amminaccia 'a mamma! E n'ato poco mme vatte pure! 'O ssape sulamente Dio chello c'aggio patuto p' 'o fa! E mò dice ca io ll'aggio fatto accussì, capite, ca io só stata!.. Ah, ca io avarria ringrazià a pateto ca m'ha lassato nnanze chisto bello suggetto!
Don Marco
Zitta!
Vito
E 'o tenite stu barbaro curaggio e 'annumenà a patemo? Patemo è muorto e vuie nun le putite purtá manco 'e scarpune, muorto e buono!
Rabbiele
Ma chesto che significa?.. Iatevenne dinto…
Donna Rosa
(piangendo)
Haie raggione, haie raggione, mo' si tuttecose tu, mo mme ne può' cacciá pure d' 'a casa!
Rabbiele
Me,' ca chillo pazzeia…
Don Marco
(a Vito)
Sentite a mme…
Vito
Io nun mme ne fido cchiú!
Donna Rosa
Io! Io nun mme ne fido cchiú! I' poco ato campo! Tu mme staie atterranno iuorno pe ghiuorno!
Vito
(esasperato, urlando)
Ma chi v' 'o fa fa? Chi v' 'o fa fa? Vuie 'a me che nne vulite?!
(Marco e Rafele lo cacciano a spintoni nella tintoria)
Donna Rosa
(rivolta al Cristo)
Giesú Cristo mio, o mm' 'o benedice o t' 'o benedico!
Amalia
(a Rabbiele)
E vedite che se vede a l'ebbreca nosta…
Rabbiele
(ironico)
Eggia'!.. Se vedeno paricchie belli ccose!..
Donna Rosa
(commossa e irritata)
I' mme ne vaco! I' ccá mmiezo nun mme ce fido 'e sta cchiú. I' n'ato poco ca ce stonco se schiatta na vena 'mpietto!
Don Marco
(uscendo dalla tintoria e accompagnando Rosa al vicolo a sinistra)
Onna Ro', iammuncenne… Vuie site na femmena raggiunebbele… (via con lei, persuadendola)
Rabbiele
(ad Amalia)
'Onn'Amá, iatevenne pure vuie, sentite a stu servitore d' 'o vuosto, aggiate pacienzia. Ccá, 'a stammatina, io nun pozzo arrivà a mettere nu punto 'nfaccia a na scarpa!
Amalia
'A strata é libbera!..
Vito
(di su la soglia della tintoria, ad Amalia)
Io ve ringrazio, 'o ssapite! Aggio ubbricazione a vuie!
Amalia
Cu me ll'avite?
Vito
Cu vuie proprio.
Amalia
E avite sbagliato 'o palazzo.
Don Marco
(tornando dal vicolo)
'Onn'Amà, ve vo' 'a sie' Rosa.
Vito
(ad Amalia, ironico)
Iate, iatela a cunzulà. Iatela a mbuttuná n'ato ppoco!
Amalia
E pecchè v'amariggiate?
Vito
Faciteme 'o piacere, 'a ccá nun ce passate tanto spissamente… Si no po' essere pure ca ve ne pentite!..
Amalia
Overamente?
Don Marco
(pigliandola pel braccio)
'Onn'Amá…
Vito
Overamente, sì!
Amalia
E po' vedimmo!.. (via, minacciosa)
Don Marco
'On Ví, nun ve pigliate collera!
Un uomo
(dalla destra)
'On Má, mme vulite fa sta barba?
Don Marco
Pronto! Iammuncenne. (entra, assieme all'avventore, nella bottega)
Rabbiele
(rimettendosi a sedere davanti al suo banchetto)
Aggia vedé si mme fanno turná a sosere! (Canta)
«Saglieno e scenneno li prufessore!
Ll'aggio perduta, nun c'è cchiú speranza!..
Nu catapláseme ncopp'a la panza…»
(Batte la suola)
Voce interna
Rabbiè?
Rabbiele
Gno'?
Voce interna
Te vo' don Peppino!
Rabbiele
(alzandosi)
All'arma d' 'e mamme voste! Chesta é 'a quarta susuta! (avvicinandosi alla bottega di Marco) 'On Má, aggiate pacienza, si ascite date n'uocchio 'o bancariello! (via per la destra)
Rafele
(uscendo sulla soglia della tintoria, a Vito che è rimasto seduto davanti alla bottega)
Mé, nun ve pigliate collera, nun ve n'incarricate cchiú!
Vito
M'hanno strutto, Rafé! Te dico a te ca m'hanno strutto! M'hanno nfracetato 'ncuorpo!..
Rafele
E ba buono. Nun ce penzate cchiù, mo…
Vito
Mo vedimmo si mme fanno fa quacche brutta bestialitá. Lloro me mettesseno n' copp' 'o punto ca po' lle faccio abbedé io chi songo!
Rafele
E ba buono. Vuie vulite sentí nu cunziglio d' 'o mio?.. (Fa per parlargli. Dalla finestra della mala casa una mano lancia una rosa. La rosa cade davanti a Vito)
Vito
(maravigliato, raccattandola)
Chi ha menata sta rosa?
Rafele
(che ha visto di dove è venuta)
Nun ce abbadate…
Vito
Chi é stato? (s'alza)
Una voce dalla tintoria
Rafe'?!..
Rafele
Quaccheduna… 'A llá ncoppa…
Vito
E chi é? 'A saie tu?
Rafele
Nun ce abbadate. Penzate 'a salute… Cheste ncuieteno 'a gente… (entra in bottega)