Miras və vəsiyyətnamə

Vigdis Hyortun bu romanı müasir Norveç ədəbiyyatında yeni bir hadisə sayılır. Ailə – məişət münasibətləri, valideynlərin övladlar arasında etdikləri ayrı – seçkilik və ən nəhayət, yaxın qohumlar arasında evlilik münasibətləri romanın əsas qayəsini təşkil edir. “Miras və vəsiyyətnamə” bir Norveç ailəsində baş verən dəhşətdən, atanın illərlə öz qızına etdiyi təcavüzdən, ananın isə bu hadisələrə göz yummasından bəhs edir. Roman ailənin ikinci övladı Berqlotun dilindən nəql edilir və dramatik və real hadisələrlə zəngindir. “Miras və vəsiyyətnamə” tarixdən, tarixə kimin sahib olmasından bəhs edir. Əsər Berqlotun bacısından vəsiyyətnamə barədə aldığı məktubla başlayır. Atayla ana nə üçünsə mirası düzgün bölməmiş və uşaqlardan ikisinə daha çox əmlak və Hvalerdə iki kottec saxlamışlar. Bu isə sözsüz ki, digər iki övladın xoşuna gəlmir, onlar özlərini təcrid edilmiş və hüquqları tapdanmış hesab edirlər. Vigdis Hyort əsərdə böyük cəsarət tələb edən, çoxlarının üstündən sükutla keçdiyi yaxın qohumlar arasındakı cinsi münasibətlərə də toxunur. Roman Norveç tənqidçiləri tərəfindən çoxlu müsbət rəy almışdır, lakin bəzi məqamlarına görə böyük söz – söhbətə də səbəb olmuşdur. Norveç ailəsi və Norveç cəmiyyətində miras, atanın doğma qızına təcavüzü… Qarşınızda maraqlı təhkiyə ilə zəngin, birnəfəsə oxunacaq kitab durur…