Read the book: «Молитвы о семье»

Name: Молитвы о семье
ISBN: 978-5-04-191150-8

Font::

Вступление

Молитва дарована нам свыше, ибо самим Спасителем сказано: «Просите, и дано будет вам». И сказано Им же: «О чем ни попросите Отца во имя Мое, даст вам». Но пусть нам и дается то, о чем мы просим, мы должны помнить, что молитва – это не средство, позволяющее нам завладеть желанным, а прежде всего – знак нашей любви и путь к этой любви. Ведь если сердце не любит, тогда душа просто не сможет молиться, – а в сердце, рождающее молитву, любовь приходит как будто сама собой. И даже если порой мы чувствуем, что наша любовь ослабела, молитва способна вернуть ее, воспламенить, усилить – и даже воскресить.

«Ты же, когда молишься, войди в комнату твою и, затворив дверь твою, помолись Отцу твоему, Который втайне; и Отец твой, видящий тайное, воздаст тебе явно», – так наставлял Спаситель учеников своих. Молитву можно совершать и дома, в уединении, перед иконой, при свете горящей лампады или свечи. И во время молитвы нужно мыслить только о ней, а не о посторонних делах. Святитель Феофан Затворник писал: «Молитва идет из сердца. Когда этой нет – и никакой нет». Ни один день не должен проходить без молитвы, иначе душа очень быстро увлекается мирской суетой.

Конечно, искренняя молитва исходит из самых глубин души, и именно в этом она должна быть нашей. «И как приятен бывает Господу этот наш собственный лепет, исходящий прямо от верующего, любящего и благодарного сердца», – так говорил святой праведный Иоанн Кронштадтский. Но суть молитвы не только в словах: вся жизнь должна обратиться в служение Богу и людям. Тогда, и только тогда наша молитва сможет звучать как настоящая правда.

Молитвы о вступлении в брак

Молитва ко Господу Иисусу Христу при бракосочетании

Го́споди Бо́же наш, во спаси́тельном Твое́м смотре́нии, сподо́бивый в Ка́не Галиле́йстей че́стный показа́ти брак Твои́м прише́ствием, ны́не рабы́ Твоя́ (имя) я́же благоволи́л еси́ сочета́тися друг другу в ми́ре и единомы́слии сохрани́: че́стный их брак покажи́, нескве́рное их ло́же соблюди́, непоро́чное их сожи́тельство пребыва́ти благослови́ и сподо́би я к ста́рости масти́тей дости́гнути, чи́стым се́рдцем де́лающе за́поведи Твоя. Ты бо еси́ Бог наш, Бог е́же ми́ловати и спаса́ти и Тебе́ сла́ву возсыла́ем, со Безнача́льным Твои́м Отце́м, Всесвяты́м и благи́м Животворя́щим Твои́м Ду́хом, ны́не и при́сно и во ве́ки веко́в. Ами́нь.

Молитвы перед иконой Божией Матери «Казанская»

Этой иконой благословляют перед венчанием молодых, перед ней молятся о семейном благополучии. По молитвам перед чудотворной иконой Пресвятая Богородица не раз спасала нашу страну от врагов и смуты.

Молитва 1-я

О, Пресвята́я Госпоже́ Влады́чице Богоро́дице! Со стра́хом, ве́рою и любо́вию пред честно́ю и чудотво́рною ико́ною Твое́ю припа́дающе, мо́лим Тя: не отврати́ лица́ Твоего́ от прибега́ющих к Тебе́. Умоли́, милосе́рдая Ма́ти, Сы́на Твоего́ и Бо́га на́шего, Го́спода Иису́са Христа́, да сохрани́т ми́рну страну́ на́шу, Це́рковь же Свою́ Святу́ю непоколеби́му да соблюде́т и от неве́рия, ересе́й и раско́ла да изба́вит. Не и́мамы бо ины́я по́мощи, не и́мамы ины́я наде́жды, ра́зве Тебе́, Пречи́стая Де́во: Ты еси́ всеси́льная христиа́н Помо́щница и Засту́пница. Изба́ви же и всех, с ве́рою Тебе́ моля́щихся, от паде́ний грехо́вных, от наве́та злых челове́к, от вся́ких искуше́ний, скорбе́й, боле́зней, бед и от внеза́пныя сме́рти. Да́руй нам дух сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние прегреше́ний, да вси, благода́рне воспева́юще вели́чия и ми́лости Твоя́, явля́емыя над на́ми зде на земли́, сподо́бимся и Небе́сного Ца́рствия, и та́мо со все́ми святы́ми просла́вим пречестно́е и великоле́пое и́мя Отца́ и Сы́на и Свята́го Ду́ха во ве́ки веко́в. Ами́нь.

Молитва 2-я

О, Пресвята́я Влады́чице Богоро́дице, Цари́це Небеси́ и земли́, вы́шшая а́нгел и арха́нгел и всея́ тва́ри честне́йшая, чи́стая Де́во Мари́е, ми́ру блага́я Помо́щнице, и всем лю́дем утвержде́ние, и во вся́ких ну́ждах избавле́ние! При́зри и ны́не, Госпоже́ Всеми́лостивая, на рабы́ Твоя́, Тебе́ умиле́нною душе́ю и сокруше́нным се́рдцем моля́щияся, со слеза́ми к Тебе́ припа́дающия и покланя́ющияся пречи́стому и цельбоно́сному о́бразу Твоему́, и по́мощи и заступле́ния Твоего́ прося́щия. О, Всеми́лостивая и Премилосе́рдая Де́во Богоро́дице Чи́стая! Воззри́, Госпоже́, на лю́ди Твоя́: мы бо гре́шнии не и́мамы ины́я по́мощи, ра́зве Тебе́ и от Тебе́ ро́ждшагося Христа́ Бо́га на́шего. Ты еси́ засту́пница и предста́тельница на́ша. Ты еси́ оби́димых защище́ние, скорбя́щим ра́дование, си́рым прибе́жище, вдо́вам храни́тельница, де́вам сла́ва, пла́чущим весе́лие, больны́м посеще́ние, немощны́м исцеле́ние, гре́шным спасе́ние. Сего́ ра́ди, о Богома́ти, к Тебе́ прибега́ем, и на Твой Пречи́стый о́браз с Предве́чным на руку́ Твое́ю держи́мым Младе́нцем, Го́сподем на́шим Иису́сом Христо́м взира́юще, умиле́нное пе́ние Тебе́ прино́сим и вопие́м: поми́луй нас, Ма́ти Бо́жия, и проше́ние на́ше испо́лни, вся бо суть возмо́жна хода́тайству Твоему́: я́ко Тебе́ сла́ва подоба́ет ны́не и при́сно и во ве́ки веко́в. Ами́нь.

Молитва перед иконой Божией Матери «Неувядаемый Цвет»

Перед иконой «Неувядаемый Цвет» молятся о сохранении девической и юношеской чистоты и целомудрия, о защите от искушений. Пресвятую Богородицу просят об удачном браке, о ниспослании достойного супруга. Чудотворный образ помогает преодолеть невзгоды и неурядицы в семейной жизни.

О, Пресвята́я и Пренепоро́чная Ма́ти Де́во, наде́ждо христиа́н и прибе́жище гре́шным! Защити́ всех в несча́стиях к Тебе́ прибега́ющих, услы́ши стена́ния на́ша, приклони́ у́хо Твое́ к моле́нию на́шему. Влады́чице и Ма́ти Бо́га на́шего, не пре́зри тре́бующия Твоея́ по́мощи и не отри́ни нас гре́шных, вразуми́ и научи́ нас, не отступи́ от нас, рабо́в Твои́х, за ропта́ние на́ше. Бу́ди нам Мать и Покрови́тельница, вруча́ем себе́ ми́лостивому Покро́ву Твоему́. Приведи́ нас, гре́шных, к ти́хой и безмяте́жной жи́зни, да опла́чем грехи́ на́ши. О, Ма́ти Мари́е, на́ша преблага́я и ско́рая Засту́пнице, покры́й нас Свои́м хода́тайством, защити́ от враго́в ви́димых и неви́димых, умягчи́ сердца́ злых люде́й, возстаю́щих на нас. О, Ма́ти Го́спода Творца́ на́шего! Ты еси́ Ко́рень Де́вства и Неувяда́ющий Цвет чистоты́ и целому́дрия, пошли́ по́мощь нам немощны́м и обурева́емым плотски́ми страстьми́ и блужда́ющим сердца́ми. Просвети́ на́ши душе́вныя о́чи, да ви́дим пути́ пра́вды Бо́жия. Благода́тию Сы́на Твоего́ укрепи́ на́шу сла́бую во́лю во исполне́ние за́поведей, да изба́вимся от вся́кия беды́ и напа́сти и оправда́ны бу́дем Твои́м пречу́дным заступле́нием на Стра́шнем Суде́ Сы́на Твоего́, Ему́же мы воздае́м сла́ву, честь и поклоне́ние ны́не и при́сно, и во ве́ки веко́в. Ами́нь.

Молитва апостолу Андрею Первозванному о выборе достойного супруга

Первозва́нне апо́столе Бо́га и Спа́са на́шего Иису́са Христа́, Це́ркве после́дователю верхо́вный, всехва́льне Андре́е, сла́вим и велича́ем апо́стольския труды́ твоя́, сла́дце помина́ем твое́ благослове́нное к нам прише́ствие, ублажа́ем честна́я страда́ния твоя́, я́же за Христа́ претерпе́л еси́, лобыза́ем свяще́нныя мо́щи твоя́, чтим святу́ю па́мять твою́ и ве́руем, я́ко жив Госпо́дь, жива́ же и душа́ твоя́ и с Ним во ве́ки пребыва́еши на Небеси́, иде́же и лю́биши ны то́южде любо́вию, е́юже возлюби́л еси́ нас, егда́ Ду́хом Святы́м прозре́л еси́ на́ше е́же ко Христу́ обраще́ние, и не то́чию лю́биши, но и мо́лиши о нас Бо́га, зря во Све́те Его́ вся ну́жды на́ша. Та́ко ве́руем и та́ко сию́ ве́ру на́шу испове́дуем во хра́ме, и́же во и́мя твое́, святы́й Андре́е, пресла́вно созда́ся, иде́же святы́я мо́щи твоя́ почива́ют; ве́рующе же, про́сим и мо́лим Го́спода и Бо́га и Спа́са на́шего Иису́са Христа́, да моли́твами твои́ми, я́же при́сно послу́шает и прие́млет, пода́ст нам вся потре́бная ко спасе́нию нас гре́шных; да я́коже ты а́бие по гла́су Го́спода, оста́вль мре́жи своя́, неукло́нно Ему́ после́довал еси́, си́це и ки́йждо от нас да и́щет не свои́х си, но е́же к созида́нию бли́жняго и о го́рнем зва́нии да помышля́ет. Иму́ще же тя предста́теля и моли́твенника о нас, упова́ем, я́ко моли́тва твоя́ мно́го мо́жет пред Го́сподем и Спаси́телем на́шим Иису́сом Христо́м, Ему́же подоба́ет вся́кая сла́ва, честь и поклоне́ние со Отце́м и Святы́м Ду́хом во ве́ки веко́в. Ами́нь.

Молитва новобрачных (молитва Товии)

Когда они остались в комнате вдвоем, Товия встал с постели и сказал: встань, сестра, и помолимся, чтобы Господь помиловал нас. И начал Товия говорить:

Благослове́н Ты, Бог отцо́в на́ших, и благослове́нно и́мя Твое́ свято́е и сла́вное вове́ки! Да благословля́ют Тебя́ небеса́ и все творе́ния Твои́!

Ты сотвори́л Ада́ма и дал ему́ помо́щницею Е́ву, подпо́рою – жену́ его́. От них произоше́л род челове́ческий. Ты сказа́л: нехорошо́ быть челове́ку одному́, сотвори́м помо́щника, подо́бного ему́.

И ны́не, Го́споди, я беру́ сию́ сестру́ мою́ не для удовлетворе́ния по́хоти, но пои́стине как жену́: благоволи́ же поми́ловать меня́, и дай мне соста́риться с не́ю!

И она сказала с ним: аминь. И оба спокойно спали в эту ночь (Тов 8:5–9).

Молитва святым благоверным князю Петру и княгине Февронии, Муромским, о любви и мире между супругами

Эти святые – символ любви, чистоты и счастья в браке. К ним обращаются с просбами помочь в решении любовных вопросов.

О, уго́дницы Бо́жии, благове́рнии кня́же Пе́тре и княги́не Февро́ние, к вам прибега́ем и к вам со упова́нием кре́пким мо́лимся: вознеси́те о нас, гре́шных (имена), святы́я моли́твы ва́ши ко Го́споду Бо́гу и испроси́те у бла́гости Его́ вся благопотре́бная душа́м и телесе́м на́шим: ве́ру пра́ву, наде́жду бла́гу, любо́вь нелицеме́рну, благоче́стие непоколеби́мо, в до́брых де́лех преуспе́яние. И хода́тайствуйте нам у Царя́ Небе́снаго житие́ благополу́чное и до́брую христиа́нскую кончи́ну. Ей, чудотво́рцы святи́и! Не пре́зрите моли́тв на́ших, но бу́дите о нас при́снии предста́телие ко Го́споду, и сподо́бите нас по́мощию ва́шею спасе́ние ве́чное получи́ти и Ца́рствие Небе́сное унасле́довати, да славосло́вим неизрече́нное человеколю́бие Отца́ и Сы́на и Свята́го Ду́ха, в Тро́ице покланя́емаго Бо́га во ве́ки веко́в.

Молитва желающих вступить в брак ко святому апостолу Симону Зилоту

Симон, по преданию, сам был женихом на галилейском браке в Кане, где Господь явил свое первое чудо.

Святы́й сла́вный и всехва́льный апо́столе Христо́в Си́моне, сподо́бивыйся прия́ти в дом твой в Ка́не Галиле́йстей Го́спода на́шего Иису́са Христа́ и Его́ Пречи́стую Ма́терь, Влады́чицу на́шу Богоро́дицу, и очеви́дцем бы́ти пресла́внаго чудесе́ Христо́ва, на бра́це твое́м явле́ннаго, претворе́ния воды́ в вино́! Мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных, и испроси́ нам свы́ше по́мощь во вре́мя уны́ния и беспомо́щия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! Не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пое и́мя Отца́ и Сы́на и Свята́го Ду́ха, во ве́ки веко́в. Ами́нь.

Молитва Архангелу Рафаилу

О, святы́й Арха́нгеле Рафаи́ле! Всеусе́рдно мо́лим тя́, бу́ди на́м путеводи́тель в жи́зни на́шей, сохрани́ от все́х ви́димых и неви́димых вра́г, исцели́ душе́вныя и теле́сныя боле́зни на́ша, упра́ви жи́знь на́шу к покая́нию во гресе́х и ко творе́нию до́брых де́л. О, святы́й вели́кий Рафаи́ле Арха́нгеле! Услы́ши на́с, гре́шных рабо́в Бо́жиих (имена), моля́щихся тебе́, и сподо́би в зде́шней и в бу́дущей жи́зни благодари́ти и сла́вити о́бщаго Созда́теля на́шего в безконе́чныя ве́ки веко́в. Ами́нь.

Молитва девицы о замужестве

О, Всеблаги́й Го́споди, я зна́ю, что вели́кое сча́стие мое́ зави́сит от того́, что́бы я Тебя́ люби́ла все́ю душе́ю и всем се́рдцем мои́м, и что́бы исполня́ла во всем святу́ю во́лю Твою́. Управля́й же Сам, о Бо́же мой, душе́ю мое́ю и наполня́й се́рдце мое́: я хочу́ угожда́ть Тебе́ Одному́, и́бо Ты Созда́тель и Бог мой. Сохрани́ мя от го́рдости и самолю́бия: ра́зум, скро́мность и целому́дрие пусть украша́ют мя. Пра́здность проти́вна Тебе́ и порожда́ет поро́ки, пода́й же ми охо́ту к трудолю́бию и благослови́ труды́ моя́. Поели́ку же Зако́н Твой повелева́ет жить лю́дям в че́стном супру́жестве, то приведи́ мя, О́тче Святы́й, к сему́ освяще́нному Тобо́ю зва́нию, не для угожде́ния вожделе́нию моему́, но для исполне́ния предназначе́ния Твоего́, и́бо Ты Сам сказа́л: нехорошо́ челове́ку быть одному́ и, созда́в ему́ жену́ в помо́щницу, благослови́л их расти́, мно́житися и населя́ти зе́млю. Услы́шь смире́нную моли́тву мою́, из глубины́ деви́чьего се́рдца Тебе́ возсыла́емую; дай мне супру́га че́стнаго и благочести́ваго, что́бы мы в любви́ с ним и в согла́сии прославля́ли Тебя́, милосе́рднаго Бо́га: Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Молитвы о счастье в семейной жизни

Молитва ко Господу об отце и матери

Го́споди Бо́же мой Иису́се Христе́! Услы́ши моли́тву мою́ о роди́телех мои́х (имена). Да́руй им единомы́слие и любо́вь во вся дни жи́зни их. Укрепи́ тела́ их во здра́вии, да послу́жат Тебе́ дела́ми ми́лости и ева́нгельскаго добра́. Научи́ мя всегда́ бы́ти послу́шным родительскому сло́ву, изба́ви мя от лицеме́рия и лука́вства в обраще́нии с ни́ми и не лиши́ нас всех оправда́ния на Стра́шном Суде́ Твое́м. Ами́нь.

Молитвы перед иконой Божией Матери «Взыскание погибших»

К этой иконе обращались невесты, выходя замуж, чтобы брак был спасительным, приходили к ней люди, погрязшие в пьянстве, погибающие в нищете, страждущие в болезнях, с молениями обращались к ней матери о погибающих детях. Считается, что если просить перед иконой Божией Матери «Взыскание погибших» избавления от эпидемии и прочих заболеваний, то она способна не только излечить, но и дать благословение.

Молитва 1-я

О, Пресвята́я и Преблагослове́нная Де́во, Влады́чице Богоро́дице! При́зри ми́лостивным Твои́м о́ком на нас, предстоя́щих пред свято́ю ико́ною Твое́ю и со умиле́нием моля́щихся Тебе́; воздви́гни нас из глубины́ грехо́вной, просвети́ ум наш, омраче́нный страстьми́, и уврачу́й я́звы душ и теле́с на́ших. Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице. Ты ве́си вся не́мощи и согреше́ния на́ша, к Тебе́ прибега́ем и вопие́м: не оста́ви нас Твое́ю Небе́сною по́мощию, но предста́ни нам при́сно и Твои́м неизрече́нным милосе́рдием и щедро́тами спаси́ и поми́луй нас, погиба́ющих. Да́руй нам исправле́ние грехо́вныя жи́зни на́шея и изба́ви нас от скорбе́й, бед и боле́зней, от внеза́пной сме́рти, а́да и ве́чной му́ки. Ты бо, Цари́це и Влады́чице, ско́рая Помо́щница и Засту́пница еси́ всем притека́ющим к Тебе́ и кре́пкое прибе́жище гре́шников ка́ющихся. Пода́ждь у́бо нам, Преблага́я и Всенепоро́чная Де́во, христиа́нский коне́ц жития́ на́шего ми́рен и непосты́ден и сподо́би нас Твои́м хода́тайством всели́тися в Оби́телях Небе́сных, иде́же непреста́нный глас пра́зднующих ра́достию сла́вит Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Молитва 2-я

Засту́пнице усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к гре́шнейший, вонми́ гла́су моле́ния моего́, вопль мой и стена́ния услы́ши, я́ко беззако́ния моя́ превзыдо́ша главу́ мою́, и аз, я́коже кора́бль в пучи́не, погружа́юся в мо́ре грехо́в мои́х. Но Ты, Всеблага́я и Милосе́рдая Влады́чице, не пре́зри мене́, отча́яннаго и во гресе́х погиба́ющаго; поми́луй мя, ка́ющагося в злых де́лех мои́х, и обрати́ на путь пра́вый заблу́ждшую окая́нную ду́шу мою́. На Тебе́, Влады́чице моя́ Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м, ны́не и при́сно и во ве́ки веко́в. Ами́нь.

Молитва 3-я

О, Пресвята́я Влады́чице и Богоро́дице, Вы́сшая Херуви́м и Честне́йшая Серафи́м, Богоизбра́нная Отрокови́це, поги́бших Взыска́ние и всех скорбя́щих Ра́досте! Пода́ждь утеше́ние и нам, в поги́бели и ско́рби су́щим; ра́зве бо Тебе́ ино́го прибе́жища и по́мощи не и́мамы. Ты еди́на еси́ ра́дости на́шея Хода́таица, и я́ко Ма́терь Бо́жия и Ма́ти милосе́рдия, предстоя́щи у Престо́ла Пресвяты́я Тро́ицы, мо́жеши нам помощи́, никто́же бо притека́яй к Тебе́ посра́млен отхо́дит. Услы́ши у́бо и нас ны́не в день поги́бели и печа́ли пред Твое́ю ико́ною припа́дающих и со слеза́ми Тебе́ моля́щихся: отжени́ от нас належа́щия на нас ско́рби и бе́ды в сей вре́менней жи́зни, не лише́ны же сотвори́ Твои́м всеси́льным хода́тайством и ве́чныя несконча́емая ра́дости в Ца́рствии Сы́на и Бо́га на́шего. Ами́нь.

Молитва перед иконой Божией Матери «Умиление»

Приими́, всеблагомо́щная, Пречи́стая Госпоже́, Влады́чице Богороди́тельнице, сия́ честны́я дары́, Тебе́ еди́ней прикла́дныя, от нас, недосто́йных рабо́в Твои́х: от всех родо́в избра́нная, всех тва́рей небе́сных и земны́х вы́сшая я́вльшаяся, поне́же бо Тебе́ ра́ди бысть Госпо́дь Сил с на́ми, и Тобо́ю Сы́на Бо́жия позна́хом и сподо́бихомся свята́го Те́ла Его́ и пречи́стыя Кро́ве Его́; те́мже блаже́нна еси́ в ро́дех родо́в, Богоблаже́нная, Херуви́мов светле́йши и Серафи́мов честне́йши су́щая. И ны́не, всепе́тая Пресвята́я Богоро́дице, не преста́й моля́щися о нас, недосто́йных рабе́х Твои́х, е́же изба́витися нам от вся́каго сове́та лука́ваго и вся́каго обстоя́ния и сохрани́тися нам неврежде́нным от вся́каго ядови́таго прило́га диа́вольскаго; но да́же до конца́ моли́твами Твои́ми неосужде́нных нас соблюди́, я́ко да Твои́м заступле́нием и по́мощию спаса́еми, сла́ву, хвалу́, благодаре́ние и поклоне́ние за вся в Тро́ице Еди́ному Бо́гу и всех Созда́телю возсыла́ем, ны́не и при́сно и во ве́ки веко́в. Ами́нь.

Молитва перед иконой Божией Матери «Иверская»

Иверская икона является хранительницей дома, где почитают этот образ. Перед иконой молятся о сохранении жилища и семейном благополучии.

О Пресвята́я Де́во, Ма́ти Го́спода, Цари́це Небесе́ и земли́! Вонми́ многоболе́зненному воздыха́нию душ на́ших, при́зри с высоты́ святы́я Твоея́ на нас, с ве́рою и любо́вию поклоня́ющихся пречи́стому о́бразу Твоему́. Се бо, грехми́ погружа́емии и скорбьми́ обурева́емии, взира́юще на Твой о́браз, я́ко живе́й Ти су́щей с на́ми, прино́сим смире́нная моле́ния на́ша. Не и́мамы бо ни ины́я по́мощи, ни ина́го предста́тельства, ни утеше́ния, то́кмо Тебе́, о, Ма́ти всех скорбя́щих и обремене́нных! Помози́ нам, не́мощным, утоли́ скорбь на́шу, наста́ви на путь пра́вый нас, заблужда́ющих, уврачу́й и спаси́ безнаде́жных, да́руй нам про́чее вре́мя живота́ на́шего в ми́ре и тишине́ проводи́ти, пода́ждь христиа́нскую кончи́ну и на Стра́шнем Суде́ Сы́на Твоего́ яви́ся нам милосе́рдая Засту́пница, да всегда́ пое́м, велича́ем и сла́вим Тя, я́ко благу́ю Засту́пницу ро́да христиа́нскаго, со все́ми угоди́вшими Бо́гу. Ами́нь.

Молитва перед иконой Божией Матери «София – Премудрость Божия»

Непостижи́мая и Всепе́тая Прему́дросте Бо́жия, Софи́е Преимени́тая, де́вственных ду́ше, си́речь Единоро́дный Сы́не, Сло́ве Бо́жий, приими́ моле́бное сие́ пе́ние от недосто́йных и скве́рных уст на́ших. А́ще и пи́сана суть: не красна́ песнь во усте́х гре́шничих, оба́че же разбо́йник еди́нем сло́вом спасе́ся, мыта́рь воздыха́нием оправда́ся и ханане́ина дщерь ма́терним проше́нием исцели́ся, поне́же Ты, Го́споди, Благ и Человеколюби́в, гряду́щаго в мир просвеща́еши, и грехи́ гре́шником отпуща́еши, и ра́зумом неразу́мных наполня́еши, и бу́ияго умудря́еши, и жа́ждущия благи́х слове́с ду́ши уче́нием Твои́м, я́ко самаряны́ню водо́ю живо́ю, напая́еши, блудника́ целому́дренна устроя́еши, разбо́йнику рай отверза́еши, зане́ Ты еси́ всех благи́х Пода́тель, и Вразуми́тель, и животу́ Храни́тель, Христе́ Бо́же наш, и Тебе́ сла́ву и хвалу́, честь и благодаре́ние и славословле́ние возсыла́ем и поклоне́ние твори́м со Безнача́льным Твои́м Отце́м, и со Пресвяты́м, и Благи́м, и Животворя́щим Твои́м Ду́хом, и со Пресвято́ю и Пренепоро́чною Твое́ю Ма́терию, Влады́чицею на́шею Богоро́дицею и Присноде́вою Мари́ею, ны́не и при́сно и во ве́ки веко́в. Ами́нь.

Молитва ко Пресвятой Богородице о семье

Влады́чице Преблагослове́нная, возьми́ под Сво́й покро́в семью` мою́. Всели́ в сердца́ супру́га моего́ и ча́д на́ших ми́р, любо́вь и непрекосло́вие всему́ до́брому; не допусти́ никого́ из семьи́ мое́й до разлуки и тя́жкаго расставания, до преждевременныя и внеза́пныя сме́рти без покая́ния. А до́м на́ш и все́х на́с, живу́щих в не́м, сохрани́ от о́гненнаго запале́ния, воровскаго нападе́ния, вся́каго зла́го обстоя́ния, разнаго страхова́ния и диа́вольскаго наважде́ния. Да и мы́ ку́пно и разде́льно, я́вно и сокрове́нно бу́дем прославлять и́мя Твое́ Свято́е всегда́, ны́не и при́сно и во ве́ки веко́в. Ами́нь.

Молитва Ангелу Xранителю

А́нгеле Христо́в святы́й, к тебе́ припа́дая молю́ся, храни́телю мой святы́й, прида́нный мне на соблюде́ние души́ и те́лу моему́ гре́шному от свята́го креще́ния, аз же свое́ю ле́ностию и свои́м злым обы́чаем прогне́вах твою́ пречи́стую све́тлость и отгна́х тя от себе́ все́ми сту́дными де́лы: лжа́ми, клевета́ми, за́вистию, осужде́нием, презо́рством, непоко́рством, братоненавиде́нием, и злопомне́нием, сребролю́бием, прелюбодея́нием, я́ростию, ску́постию, объяде́нием без сы́тости и опи́вством, многоглаго́ланием, злы́ми по́мыслы и лука́выми, го́рдым обы́чаем и блу́дным возбеше́нием, имы́й самохоте́ние на вся́кое плотско́е вожделе́ние. О, зло́е мое́ произволе́ние, его́же и ско́ти безслове́снии не творя́т! Да ка́ко возмо́жеши воззре́ти на мя, или́ приступи́ти ко мне, а́ки псу смердя́щему? Кото́рыма очи́ма, А́нгеле Христо́в, воззри́ши на мя, опле́тшася зле во гну́сных де́лех? Да ка́ко уже́ возмогу́ отпуще́ния проси́ти го́рьким и злы́м мои́м и лука́вым дея́нием, в ня́же впа́даю по вся дни и но́щи и на всяк час? Но молю́ся ти припа́дая, храни́телю мой святы́й, умилосе́рдися на мя гре́шнаго и недосто́йнаго раба́ твоего́ (имя), бу́ди ми помо́щник и засту́пник на зла́го моего́ сопроти́вника, святы́ми твои́ми моли́твами, и Ца́рствия Бо́жия прича́стника мя сотвори́ со все́ми святы́ми, всегда́, и ны́не и при́сно и во ве́ки веко́в. Ами́нь.

Молитва святому апостолу и евангелисту Марку о добрых отношениях в семье

О пресла́вный апо́столе и ева́нгели́сте Ма́рко, ду́шу за Христа́ преда́вый и кро́вию твое́ю па́жить Его́ удобри́вый! При́зри на на́с, ча́д Госпо́дних многогре́шных, все́х зде́ ны́не предстоя́щих и моля́щихся (имена), моли́твы и воздыха́ния сердца́ми сокруше́нными ны́не принося́щих. Се́ бо беззако́ньми омрачи́хомся, и того́ ра́ди беда́ми, я́коже ту́чами, обложи́хомся, еле́а же до́браго жития́ обнища́хом зело́, и не возмо́жем проти́витися во́лком хи́щным, и́же расхища́ти насле́дие Бо́жие де́рзостно тща́тся. О, всехва́льный апо́столе и ева́нгели́сте Ма́рко! Просвети́ на́с све́том Свята́го Ева́нгелия Госпо́дня, вразуми́ истреби́ти не́мощи на́ша, помоги́ не отлуча́тися от Го́спода Спа́са на́шего, да не разлучи́мся в коне́ц от любве́ Бо́жия, но кре́пким заступле́нием твои́м на́с защити́, да поми́лует Госпо́дь все́х на́с моли́тв твои́х ра́ди, да вразуми́т сло́вом Свои́м и рукописа́ние безме́рных грехо́в на́ших истреби́т, и да сподо́бит со все́ми святы́ми апо́столы во блаже́нном Ца́рствии воспева́ти Пресвяту́ю и Неразде́льную Тро́ицу, Отца́ и Сы́на и Свята́го Ду́ха, и ны́не и при́сно и во ве́ки веко́в! Ами́нь.

Молитва Архангелу Варахиилу, покровителю благочестивых семей

Святы́й Арха́нгеле Бо́жий Варахии́ле, благослове́ние от Го́спода нам принося́щий, благослови́ мя положи́ть нача́ло благо́е, исправле́ние неради́вого моего́ жития́, да угожду́ во всем Го́споду Спаси́телю моему́ во ве́ки веко́в. Ами́нь.

Молитва святым мученикам Адриану и Наталии о преумножении любви между супругами

Святой Адриан был заключен в темницу, где его сильно избивали и впоследствии убили. Его жена, святая Наталия, скончалась на могиле своего мужа. Святым молятся о любви между супругами, о ладе и добрых отношениях в семье.

О, свяще́нная дво́ице, святи́и му́ченицы Христо́ви, Адриа́не и Ната́лие, блаже́ннии супру́зи и до́блии страда́льцы! Услы́шите нас, моля́щихся вам со слеза́ми, и низпосли́те на ны вся благопотре́бная душа́м и телесе́м на́шим, и моли́те Христа́ Бо́га, да поми́лует нас и сотвори́т с на́ми по ми́лости Свое́й, да не поги́бнем во гресе́х на́ших. Ей, святи́и му́ченицы, приими́те глас моле́ния на́шего и изба́вите ны моли́твами ва́шими от гла́да, губи́тельства, тру́са, пото́па, огня́, гра́да, меча́, на́шествия иноплеме́нников и междоусо́бныя бра́ни, от напра́сныя сме́рти и от всех бед, печа́лей и боле́зней, да вы́ну, ва́шими моли́твами и предста́тельством укрепля́емии, просла́вим Го́спода Иису́са Христа́, Ему́же подоба́ет вся́кая сла́ва, честь и поклоне́ние, со Безнача́льным его́ Отце́м и Пресвяты́м Ду́хом, во ве́ки веков. Ами́нь.

Молитва преподобного Антония Оптинского о семье

В ру́це превели́каго милосе́рдия, о Бо́же, вруча́ю ду́шу мою́ и многоболе́зненное те́ло, му́жа, от Тебе́ мне да́ннаго, и всех возлю́бленных дете́й. Ты бу́ди Помо́щником на́шим и покрови́телем во всей жи́зни на́шей, во исхо́де на́шем и по кончи́не, в ра́дости и печа́ли, в сча́стии и несча́стии, в боле́зни и здоро́вье, в жи́зни и сме́рти, во всем да бу́дет с на́ми во́ля Твоя́ свята́я, я́ко на небеси́ и на земли́. Ами́нь.

Молитвы мученице Параскеве Пятнице

Параскева, повзрослев, дала обет безбрачия, посвятив себя служению Христовой вере. Ей молятся о хороших женихах, а также о благополучии в браке.

Молитва 1‑я

О, свята́я и преблаже́нная му́ченице Христо́ва Параске́во, красото́ деви́ческая, му́чеников похвало́, чистоты́ о́бразе, великоду́шных зерца́ло, прему́дрых удивле́ние, ве́ры христиа́нския храни́тельнице, и́дольския льсти обличи́тельнице, Ева́нгелия Боже́ственнаго побо́рнице, за́поведей Госпо́дних ревни́тельнице, сподо́бльшаяся приити́ ко приста́нищу ве́чного поко́я и в черто́зе Жениха́ твоего́, Христа́ Бо́га, све́тло веселя́щаяся, сугу́бым венце́м де́вства и му́ченичества украше́нная! Мо́лим тя, свята́я му́ченице: бу́ди о нас печа́льница ко Христу́ Бо́гу, Его́же преблаже́ннейшим зре́нием при́сно весели́шися: моли́ Всеми́лостиваго, и́же сло́вом о́чи слепы́м отве́рзе, да изба́вит нас от боле́зни оче́с на́ших, теле́сных вку́пе и душе́вных; разжени́ твои́ми святы́ми моли́твами те́мный мрак, прибы́вший от грехо́в на́ших; испроси́ у Отца́ Све́тов свет благода́ти душе́вным и теле́сным очесе́м на́шим; просвети́ нас, омраче́нных грехми́, све́том Бо́жия благода́ти, да твои́х ра́ди святы́х моли́тв да́стся безоче́сным сла́дкое зре́ние. О вели́кая уго́днице Бо́жия! О му́жественнейшая де́во! О кре́пкая му́ченице свята́я Параске́во! Святы́ми твои́ми моли́твами бу́ди нам гре́шным помо́щница, хода́тайствуй и моли́ся о окая́нных и зело́ неради́вых гре́шницех, ускори́ на по́мощь нам, я́ко зело́ не́мощни есмы́. Моли́ Го́спода, чи́стая деви́це, моли́ Милосе́рдаго, свята́я му́ченице, моли́ Жениха́ твоего́, непоро́чная Христо́ва неве́сто, да твои́ми моли́твами посо́бствовани, мра́ка же грехо́внаго избы́вше, во све́те и́стинныя ве́ры и дея́ний Боже́ственных вни́дем во свет ве́чный дне невече́рняго, во Град весе́лия при́снаго, в не́мже ты ны́не све́тло блиста́еши сла́вою и весе́лием безконе́чным, славосло́вящи и воспева́ющи со все́ми Небе́сными Си́лами Трисия́тельное Еди́ное Божество́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Молитва 2‑я

Свята́я неве́сто Христо́ва, многострада́льная му́ченице Параске́во! Ве́мы, я́ко от ю́ности твоея́ ты все́ю душе́ю твое́ю и всем се́рдцем твои́м возлюби́ла еси́ Царя́ сла́вы, Христа́ Спаси́теля и Ему́ еди́ному уневе́стилася еси́, разда́вши име́ния твоя́ неиму́щим и бе́дным. Ты си́лою благоче́стия твоего́, твои́м целому́дрием и пра́ведностию, я́ко луча́ми со́лнечными, просия́ла еси́, жи́вши свя́то среди́ неве́рных и безбоя́зненно пропове́давши им Христа́ Бо́га. Ты, от дней ю́ности твоея́, науче́нная твои́ми роди́телями, всегда́ благогове́йно че́ствовала дни искупи́тельных страсте́й Го́спода на́шего Иису́са Христа́, Его́же ра́ди и сама́ доброво́льно пострада́ла еси́. Ты, десни́цею А́нгела Бо́жия от неисце́льных ран ди́вно исцеле́нная и восприя́вшая неизрече́нную све́тлость, изуми́ла еси́ неве́рных мучи́телей. Ты, и́менем Го́спода на́шего Иису́са Христа́ и си́лою моли́твы твое́ю в ка́пище язы́ческом всех и́долов до́лу пове́ргши, в прах сокруши́ла еси́ я́. Ты, опаля́емая свеща́ми, еди́ною моли́твою твое́ю ко всеси́льному Го́споду угаси́ла еси́ огнь есте́ственный, и тем же пла́менем, чуде́сне возжже́нным чрез А́нгела Бо́жия, попали́вши неи́стовых беззако́нников, мног наро́д привела́ еси́ к позна́нию и́стиннаго Бо́га. Ты, во сла́ву Го́спода прия́вши ме́чное главы́ твоея́ усече́ние от мучи́телей, до́блественно сконча́ла еси́ страда́льческий твой по́двиг, возше́дши душе́ю твое́ю на Небеса́, в черто́г вожделе́ннаго твоего́ Жениха́ Христа́ Царя́ Сла́вы, ра́достно сре́тшаго тя сим небе́сным гла́сом: «Ра́дуйтеся, пра́веднии, я́ко му́ченица Параске́ва увенча́ся!» Те́мже и мы днесь приве́тствуем тя, многострада́льная, и, взира́юще на святу́ю твою́ ико́ну, с умиле́нием вопие́м ти: всечестна́я Параске́во! Ве́мы, я́ко ве́лие и́маши дерзнове́ние ко Го́споду: умоли́ у́бо Его́ Человеколю́бца и о нас с предстоя́щих и моля́щихся ти, да пода́ст Он и нам, я́коже тебе́, терпе́ние и благоду́шие в беда́х и ско́рбных обстоя́ниях; да да́рует Он, хода́тайством твои́м и заступле́нием, ра́достное, благоде́нственное и ми́рное житие́, здра́вие же и спасе́ние, и во всем благо́е поспеше́ние возлю́бленному на́шему оте́честву, да ниспосле́т свято́е Свое́ благослове́ние и мир, и всем правосла́вным христиа́нам да пода́ст твои́ми святы́ми моли́твами утвержде́ние в ве́ре, благоче́стии и свя́тости, преспе́яние же в христиа́нской любви́ и вся́кой доброде́тели: да очи́стит нас гре́шных от вся́кой скве́рны и поро́ка, да огради́т нас святы́ми Свои́ми А́нгелами, да засту́пит, сохрани́т и поми́лует всех свято́ю Свое́ю благода́тию и соде́лает насле́дниками и прича́стниками Небе́снаго Своего́ Ца́рствия. И та́ко улучи́вше спасе́ния твои́ми святы́ми моли́твами, предста́тельством и заступле́нием, всесла́вная неве́сто Христо́ва Параске́во, просла́вим все пречи́стое и великоле́пое и́мя ди́внаго во святы́х Свои́х и́стиннаго Бо́га, Отца́ и Сы́на и Свята́го Ду́ха, всегда́, ны́не и при́сно и во ве́ки веко́в. Ами́нь.

Молитвы блаженной Ксении Петербургской

К святой Ксении Петербургской обращаются с просьбой о ниспослании достойного жениха, а также о помощи в устроении житейских дел и избавлении от различных бед.

Молитва 1‑я

О, свята́я всеблаже́нная ма́ти Ксе́ние! Под покро́вом Всевы́шняго жи́вшая, ведо́мая и укрепля́емая Богома́терию, глад и жа́жду, хлад и зной, поноше́ния и гоне́ния претерпе́вшая, дар прозорли́вости и чудотворе́ния от Бо́га прия́ла еси́ и под се́нию Всемогу́щаго поко́ишися. Ны́не Свята́я Це́рковь, я́ко благоуха́нный цвет, прославля́ет тя. Предстоя́ще на ме́сте твоего́ погребе́ния, пред о́бразом твои́м святы́м, я́ко живе́й ти, су́щей с на́ми, мо́лимся ти: приими́ проше́ния на́ша и принеси́ их ко Престо́лу Милосе́рдаго Отца́ Небе́снаго, я́ко дерзнове́ние к Нему́ иму́щая. Испроси́ притека́ющим к тебе́ ве́чное спасе́ние, на блага́я дела́ и начина́ния на́ша ще́дрое благослове́ние, от вся́ких бед и скорбе́й избавле́ние. Предста́ни святы́ми твои́ми моли́твами пред Всеми́лостивым Спаси́телем на́шим о нас, недосто́йных и гре́шных. Помози́, свята́я блаже́нная ма́ти Ксе́ние, младе́нцы све́том Свята́го Креще́ния озари́ти и печа́тию да́ра Ду́ха Свята́го запечатле́ти, о́троки и отрокови́цы в ве́ре, че́стности, богобоя́зненности и целому́дрии воспита́ти и успе́хи в уче́нии им дарова́ти; боля́щия и неду́гующия исцели́, семе́йным любо́вь и согла́сие низпосли́, мона́шествующим по́двигом до́брым подвиза́тися удосто́й и от поноше́ний огради́, па́стыри в кре́пости Ду́ха Свята́го утверди́, наро́д и страну́ на́шу в ми́ре и безмяте́жии сохрани́, о лише́нных в предсме́ртный час причаще́ния Святы́х Христо́вых Та́ин умоли. Ты бо еси́ на́ша наде́жда и упова́ние, ско́рое услы́шание и избавле́ние, тебе́ благодаре́ние возсыла́ем и с тобо́ю сла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Молитва 2‑я

О, пресла́вная свята́я блаже́нная ма́ти на́ша Ксе́ние, те́плая о нас пред Бо́гом моли́твеннице! Я́коже пре́жде к надгро́бию твоему́ припа́давшии, си́це ны́не и мы по прославле́нии твое́м к моще́м твои́м прибега́юще, про́сим: помоли́ся Го́споду, да освяти́т на́ши ду́ши и телеса́, да просвети́т ум, очи́стит со́весть от вся́кия скве́рны, нечи́стых помысло́в, лука́вых и ху́льных умышле́ний и от вся́каго превозноше́ния, го́рдости же и киче́ния, высокоу́мия же и де́рзости, от вся́каго фарисе́йскаго лицеме́рия, и от вся́каго сту́днаго и лука́ваго обы́чия на́шего; да да́рует нам и́скреннее покая́ние, сокруше́ние серде́ц на́ших, смиренному́дрие, кро́тость же и ти́хость, благогове́ние, ра́зум же духо́вный со вся́ким благоразу́мием и благодаре́нием. Утаи́вшая себе́ от му́дрых ве́ка сего́, но Бо́гу зна́емая, испроси́ же стране́ на́шей Росси́йстей от бед лю́тых избавле́ние, всего́ на́шего жития́ обновле́ние и исправле́ние, соблюди́ нас во вся́ком благочести́вом правосла́вном испове́дании ве́ры христиа́нския, я́ко да ублажа́юще тя сподо́бимся во вся дни воспева́ти, благодари́ти и сла́вити Отца́ и Сы́на и Свята́го Ду́ха, Тро́ицу Единосу́щную, Животворя́щую и Неразде́льную во ве́ки веко́в. Ами́нь.

Молитва 3‑я

О, свята́я уго́дница Бо́жия блаже́нная Ксе́ния! При́зри ми́лостиво твои́м о́ком на нас, раб Бо́жиих (имена), честно́й твое́й ико́не уми́льно моля́щиеся и прося́щие у тебе́ по́мощи и заступле́ния. Простри́ ко Го́споду Бо́гу на́шему те́плыя твоя́ моли́твы и испроси́ душа́м на́шим оставле́ние прегреше́ний. Се бо мы се́рдцем сокруше́нным, и ду́хом смире́нным тебе́ хода́таицу ми́лостивую ко Влады́це и моли́твенницу за ны, гре́шныя, призыва́ем, я́ко ты прия́ла еси́ от Него́ благода́ть моли́тися за ны и от бед избавля́ти. Тебе́ у́бо про́сим, не пре́зри нас недосто́йных, моля́щихся тебе́ и твое́й по́мощи тре́бующих, и исходата́йствуй всем вся ко спасе́нию поле́зная, я́ко да твои́ми ко Го́споду Бо́гу моли́твами получи́вши благода́ть и ми́лость просла́вим всех благи́х Исто́чника и Даропода́теля и Бо́га Еди́наго, в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Молитвы великомученице Екатерине Александрийской

Екатерина объявила, что выйдет замуж за того, кто превзойдет ее в знатности, богатстве, красоте и мудрости. Образ Жениха Небесного Иисуса Христа родил в душе девы горячее желание увидеть Его. После Святого Крещения ей было видение Божией Матери с Младенцем Иисусом, Который ласково смотрел на Екатерину и дал ей перстень, обручив ее Себе. Когда видение кончилось, Екатерина увидела на своей руке кольцо. Святой Екатерине молятся, чтобы Господь послал хорошего жениха, а также о помощи в родах.

Молитва 1‑я

О, свята́я великому́ченице Екатери́но, избра́нный чистоты́ сосу́де, сто́лпе Правосла́вия, предста́тельнице на́ша благонаде́жная, подви́жнице зако́нная, свята́я, на Святе́й Горе́ свя́то почива́ющая! Зане́ сама́ яви́ла еси́ христиа́ном вину́ к тебе́ моли́тися, приле́жно мо́лим тя: прини́кши свы́ше, вонми́ гла́су моле́ния на́шего, при́зри на бе́дствия нас гре́шных, просвети́ омраче́ние ума́ на́шего, сотвори́ нас го́рняя му́дрствовати, а не земна́я. Поспеши́ нам моли́твами твои́ми побежда́ти плотска́я похоте́ния, к ми́ру пристра́стие и ко́зни злых духо́в, на нас зло́бно вою́ющих, да твои́м предста́тельством во дни жития́ сего́ свобо́дни яви́мся от вражде́бных их нападе́ний и по исхо́де от возду́шных их истяза́ний. О, прему́драя де́во! Да́руй нам вся я́же к по́льзе проше́ния: мо́жеши бо мно́гая испроси́ти у возлю́бленнаго Жениха́ твоего́, Христа́ Бо́га на´шего. Мы ве́мы, я́ко мно́го мо́жет моли́тва пра́веднаго, поспешеству́емая бла́гостию милосе́рдаго Бо́га, Ему́же сла́ва, честь и благодаре́ние всегда́, ны́не и при́сно и во ве́ки веко́в. Аминь.

Молитва 2‑я

О, свята́я Екатери́но, де́во и му́ченице, и́стинная Христо́ва неве́сто! Мо́лим тя чрез особли́вую благода́ть, е́юже предвари́ тя Жени́х твой, Сладча́йший Иису́с: я́коже посрами́вши пре́лести мучи́теля, му́дростию твое́ю пятдеся́т вети́й победи́ла еси́ и, напои́вши их Небе́сным уче́нием, к све́ту и́стинныя ве́ры наста́вила еси́, та́ко испроси́ и нам о́ную Бо́жию му́дрость, да и мы, расто́ргнувше вся ко́зни а́дскаго мучи́теля и презре́в ми́ра и пло́ти собла́зны, досто́йны яви́мся Боже́ственныя сла́вы и к разшире́нию святы́я на́шея правосла́вныя ве́ры сосу́ды досто́йны соде́лаемся, и с тобо́ю в Небе́сной ски́нии Го́спода и Влады́ку на́шего Иису́са Христа́ хва́лим и прославля́ем во вся ве́ки. Ами́нь.

Молитва 3‑я

О, свята́я де́во и му́ченице Екатери́но! Мо́лим тя: при́зри на бе́дствия нас, гре́шных раб Бо́жиих (имена), сотвори́ нас го́рняя му́дрствовати, а не земна́я. Поспеши́ нам моли́твами твои́ми побежда́ти плотска́я похоте́ния, к ми́ру пристра́стие и ко́зни злых духо́в, на нас зло́бно вою́ющих; да твои́м предста́тельством во дни жития́ сего́ свобо́дни яви́мся от вражде́бных их нападе́ний и по исхо́де от возду́шных их истяза́ний. О, прему́драя де́во! Да́руй нам вся я́же к по́льзе проше́ния, мо́жеши бо мно́гая испроси́ти у Возлю́бленнаго Жениха́ твоего́, Христа́ Бо́га на́шего. Мы ве́мы, я́ко мно́го мо́жет моли́тва пра́веднаго, поспешеству́емая бла́гостию Милосе́рдаго Бо́га, Ему́же сла́ва, честь и благодаре́ние всегда́, ны́не и при́сно и во ве́ки веко́в. Ами́нь.

Молитвы о благополучии в браке и об устранении семейных неурядиц

Молитвы святому апостолу Иоанну Богослову

За глубокую любовь ко Господу и всем людям апостол Иоанн назван «апостолом любви». Святому Иоанну Богослову молятся о добрых отношениях в семье.

Молитва 1‑я

О, вели́кий и всехва́льный апо́столе и евангели́сте Иоа́нне Богосло́ве, напе́рсниче Христо́в, те́плый наш засту́пниче и ско́рый в ско́рбех помо́щниче! Умоли́ Го́спода Бо́га дарова́ти нам оставле́ние всех прегреше́ний на́ших, ели́ко согреши́хом от ю́ности на́шея во всем житии́ на́шем де́лом, сло́вом, помышле́нием и все́ми на́шими чу́вствы. Во исхо́де же душ на́ших помози́ нам, гре́шным, изба́витися от возду́шных мыта́рств и ве́чнаго муче́ния, да твои́м ми́лостивным предста́тельством прославля́ем Отца́ и Сы́на и Свята́го Ду́ха ны́не и при́сно и во ве́ки веко́в. Ами́нь.

Молитва 2‑я

О, вели́кий апо́столе, евангели́сте громогла́сный, Богосло́ве изя́щнейший, тайнови́дче неизрече́нных открове́ний, де́вственниче и возлю́бленный напе́рсниче Христо́в Иоанне! Приими́ нас, гре́шных, прибега́ющих под твое́ си́льное заступле́ние и покрови́тельство. Испроси́ у Всеще́драго Человеколю́бца, Христа́ Бо́га на́шего, И́же пред очесы́ твои́ми кровь Свою́ дража́йшую излия́ за нас, непотре́бных рабо́в Свои́х, да не помяне́т беззако́ний на́ших, но да поми́лует нас и сотвори́т с на́ми по ми́лости Свое́й: да да́рует нам здра́вие душе́вное и теле́сное, вся́кое благоде́нствие и изоби́лие, наставля́я нас обраща́ти о́ныя во сла́ву Его́, Творца́, Спаси́теля и Бо́га на́шего. По кончи́не же вре́менныя жи́зни на́шея да избе́гнем мы, святы́й апо́столе, немилосе́рдых истяза́телей, на возду́шных мыта́рствах нас ожида́ющих, но да дости́гнем, тобо́ю води́мии и покрыва́емии, Го́рняго о́наго Иерусали́ма, его́же сла́ву ты в открове́нии узре́л еси́, а ны́не наслажда́ешися о́ныя ра́дости, обе́щанныя избра́нным Бо́жиим. О вели́кий Иоа́нне! Сохрани́ вся гра́ды и страны́ христиа́нския и всех, призыва́ющих и́мя твое́, от гла́да, губи́тельства, тру́са и пото́па, огня́, меча́, и наше́ствия иноплеме́нных, и междоусо́бныя бра́ни; изба́ви нас от вся́кия беды́ и напа́сти и моли́твами твои́ми отврати́ от нас пра́ведный гнев Бо́жий и испроси́ нам Его́ милосе́рдие. О вели́кий и непостижи́мый Бо́же! Се на умоле́ние Тебе́ предлага́ем свята́го Иоа́нна, его́же Ты сподо́бил еси́ неизрече́нных открове́ний, приими́ о нас хода́тайство, да́руй нам исполне́ние проше́ний на́ших во сла́ву Твою́, па́че же соверши́ нас духо́вным соверше́нством к наслажде́нию жи́зни несконча́емыя в Небе́сных Твои́х оби́телех. О Небе́сный О́тче, созда́вый вся Влады́ко, Всеси́льный Царю́! Косни́ся благода́тию серде́ц на́ших, да, раста́явше, я́ко воск, пролию́тся пред Тобо́ю и бре́нная тварь духо́вна сотвори́тся в честь и сла́ву Твою́, и Сы́на Твоего́, и Свята́го Ду́ха. Ами́нь.

Молитвы святителю Иоанну Златоусту, архиепископу Константинопольскому

У святителя Иоанна Златоуста просят благополучия в браке. Ему также молятся о просвещении разума, о духовной грамоте и о помощи в трудную минуту, в отчаянии.

Молитва 1-я

О, святи́телю вели́кий Иоа́нне Златоу́сте! Мно́гая и разли́чная дарова́ния от Го́спода прия́л еси́ и, я́ко раб благи́й и ве́рный, вся да́нныя тебе́ тала́нты до́бре умно́жил еси́: сего́ ра́ди вои́стину вселе́нский учи́тель был еси́, я́ко всяк во́зраст и вся́ко зва́ние от тебе́ поуча́ется. Ты еси́ отроко́м – послуша́ния о́браз, ю́ным – целому́дрия свети́ло, муже́м – трудолю́бия наста́вник, ста́рым – незло́бия учи́тель, и́ноком – воздержа́ния пра́вило, моля́щимся – вождь от Бо́га вдохнове́нный, му́дрости и́щущим – ума́ просвети́тель, вити́ям доброглаго́ливым – сло́ва жива́го исто́чник неисчерпа́емый, благотворя́щим – милосе́рдия звезда́, нача́льствующим – правле́ния му́драго о́браз, пра́вды ревни́телем – дерзнове́ния вдохнови́тель, пра́вды ра́ди гони́мым – терпе́ния наста́вник: всем вся был еси́, да вся́ко не́кия спасе́ши. Над все́ми же си́ми стяжа́л еси́ любо́вь, я́же есть соу́з соверше́нства, и то́ю, я́ко си́лою Боже́ственною, вся дарова́ния во еди́нем лице́ твое́м во еди́но совокупи́л еси́, и ту́южде любо́вь, разделе́нная примиря́ющую, в толкова́нии слове́с апо́стольских всем ве́рным пропове́дал еси́. Мы же гре́шнии, по еди́ному ки́йждо свое́ дарова́ние иму́ще, едине́ния ду́ха в сою́зе ми́ра не и́мамы, быва́ем тщесла́вни, друг дру́га раздража́юще, друг дру́гу зави́дяще: сего́ ра́ди дарова́ния на́ша разделе́нная не в мир и спасе́ние, но во вражду́ и осужде́ние нам явля́ются. Те́мже к тебе́, святи́телю Бо́жий, припа́даем, раздо́ром обурева́еми, и в сокруше́нии се́рдца про́сим: моли́твами твои́ми, отжени́ от серде́ц на́ших вся́ку го́рдость и за́висть, нас разделя́ющия, да во мно́зех у́дех еди́но те́ло церко́вное бу́дет, да по словеси́ твоему́ моли́твенному возлю́бим друг дру́га и единомы́слием испове́мы Отца́ и Сы́на и Свята́го Ду́ха, Тро́ицу Единосу́щную и Неразде́льную, ны́не и при́сно и во ве́ки веко́в. Ами́нь.

Молитва 2-я

Молитва мученикам и исповедникам Гурию, Самону и Авиву об устранении семейных неурядиц

Мученики Гурий, Самон и Авив считаются покровителями семьи и брака. К ним также обращаются за помощью в семейных разногласиях и неурядицах.

О святи́и му́ченицы и испове́дницы Христо́вы Гу́рие, Само́не и Ави́ве! Те́плии о нас хода́таи и моли́твенницы пред Бо́гом, во умиле́нии серде́ц на́ших, взира́я на пречи́стый ваш о́браз, смире́нно мо́лим вас: услы́шите нас, гре́шных и недосто́йных рабо́в свои́х, су́щих в бе́дах, ско́рбех и напа́стех, и призре́в на́ша тя́жкая и бесчи́сленная прегреше́ния, яви́те нам свою́ вели́кую ми́лость, воздви́гните нас из глубины́ грехо́вныя, просвети́те наш ум, смягчи́те зло́е и окая́нное се́рдце, прекрати́те за́висть, вражду́ и раздо́ры, в нас живу́щие. Осени́те нас ми́ром, любо́вию и стра́хом Бо́жиим, умоли́те милосе́рднаго Го́спода, да покры́ет мно́жество грехо́в на́ших Свои́м неизрече́нным милосе́рдием. Да соблюде́т Це́рковь Свою́ святу́ю от неве́рия, е́ресей и раско́лов. Да пода́ст стране́ на́шей мир, благоде́нствие, земли́ плодоро́дие; супру́гам любо́вь и согла́сие; ча́дам послуша́ние; оби́димым терпе́ние; оби́дящим страх Бо́жий; скорбя́щим благоду́шие; ра́дующимся воздержа́ние. Всех же нас да покры́ет Свое́ю всеси́льною десни́цею, и да изба́вит от гла́да, губи́тельства, тру́са, пото́па, огня́, меча́, наше́ствия иноплеме́нников и междоусо́бныя бра́ни, и напра́сныя сме́рти. Да огради́т нас ополче́нием святы́х Свои́х А́нгелов, во е́же изба́витися нам по исхо́де на́шем из жития́ сего́ от ко́зней лука́ваго и та́йных возду́шных мыта́рств его́, и не осужде́нными предста́ти Престо́лу Го́спода Сла́вы, иде́же ли́цы святы́х А́нгел со все́ми святы́ми вы́ну сла́вят пресвято́е и великоле́пое и́мя Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Молитвы о мире в семье

Молитва ко Господу об умножении любви и искоренении ненависти и злобы

Сою́зом любве́ апо́столы Твоя́ связа́вый, Христе́, и нас Твои́х ве́рных рабо́в к Себе́ тем кре́пко связа́в, твори́ти за́поведи Твоя́ и друг дру́га люби́ти нелицеме́рно сотвори́, моли́твами Богоро́дицы, Еди́не Человеколю́бче. Пла́менем любве́ распали́ к Тебе́ сердца́ на́ша, Христе́ Бо́же, да то́ю разжига́еми, се́рдцем, мы́слию же и душе́ю, и все́ю кре́постию на́шею возлю́бим Тя, и и́скренняго своего́ я́ко себе́, и повеле́ния Твоя́ храня́ще сла́вим Тя, всех благ Да́теля.

Молитвы святителя Тихона Задонского об умиротворении беснующейся души и укрощении страстей

Молитва 1-я

Поми́луй мя Го́споди, Сы́не Бо́жий: душа́ моя зле бесну́ется. Го́споди, помози́ ми. Даждь ми, да насы́щуся и аз, я́ко пес от крупи́ц, па́дающих от тра́пезы рабо́в Твои́х. Ами́нь.

Молитва 2-я

Поми́луй мя, Го́споди, Сы́не Бо́жий, Сы́не Дави́дов по пло́ти, я́коже поми́ловал еси́ ханане́ю: душа́ моя́ зле бесну́ется гне́вом, я́ростию, по́хотию зло́ю и прочими пагубными страстьми. Го́споди! Помози́ мне, вопию́ Тебе́, не на земли́ ходя́щему, но одесну́ю Отца́ на небесе́х седя́щему. Ей, Го́споди! Даждь мне се́рдце ве́рою и любо́вию после́довати Твоему́ смире́нию, бла́гости, кро́тости и долготерпе́нию, да и в ве́чном Твое́м Ца́рствии сподо́блюся причаща́тися тра́пезы рабо́в Твои́х, и́хже избра́л еси́. Ами́нь.

Молитвы преподобного Силуана Афонского

Преподобному Силуану молятся о даровании смирения и любви ко всем людям.

Молитвенное прошение преподобного Силуана Афонского

Прости́ мне, Го́споди, и́бо я не́мощен зе́ло, и да́руй мне мир Твой, кото́рый Ты дае́шь раба́м Твои́м.

Молитва 1‑я

О, преди́вный уго́дниче Бо́жий, о́тче Силуа́не! По благода́ти, тебе́ от Бо́га да́нней, сле́зно моли́тися о всей вселе́нней, ме́ртвых, живы́х и гряду́щих, не премолчи́ за нас ко Го́споду, к тебе́ усе́рдно припа́дающих и твоего́ предста́тельства уми́льно прося́щих. Подви́гни, о всеблаже́нне, на моли́тву усе́рдную Засту́пницу ро́да христиа́нскаго, Преблагослове́нную Богоро́дицу и Присноде́ву Мари́ю, чу́дно призва́вшую тя бы́ти ве́рна де́лателя в Ея́ земне́м вертогра́де, иде́же избра́нницы Бо́жии о гресе́х на́ших ми́лостива и долготерпели́ва бы́ти Бо́га умоля́ют, во е́же не помяну́ти непра́вд и беззако́ний на́ших, но, по неизрече́нней бла́гости Го́спода на́шего Иису́са Христа́, уще́дрити и спасти́ нас по вели́цей Его́ ми́лости. Ей, уго́дниче Бо́жий, с Преблагослове́нною Влады́чицею ми́ра, Святе́йшею Игу́мениею, и святы́ми подви́жники Ея́ земна́го жре́бия, испроси́ у святы́х Святе́йшаго Сло́ва Святе́й Горе́ Афо́нстей и боголюби́вым пустынножи́телем ея́ от всех бед и наве́тов вра́жиих в ми́ре сохрани́тися, да А́нгелы святы́ми от зол избавля́еми и Ду́хом Святы́м в ве́ре и братолю́бии укрепля́еми, до сконча́ния ве́ка о Еди́ней, Святе́й, Собо́рней и Апо́стольстей Це́ркви моли́твы творя́т и всем спаси́тельный путь указу́ют, да Це́рковь земна́я и Небе́сная непреста́нно славосло́вит Творца́ и Отца́ Све́тов, просвеща́ющи и освяща́ющи мир в ве́чней пра́вде и бла́гости Бо́жией. Наро́дом всего́ ми́ра испроси́ благоде́нственнаго и ми́рнаго жития́, ду́ха смиренному́дрия и братолю́бия, добронра́вия и спасе́ния, ду́ха стра́ха Бо́жия, да не зло́ба и беззако́ние ожесточа́ют сердца́ людска́я, жела́юще истреби́ти любо́вь Бо́жию в челове́цех и низве́ргнути их в богопроти́вныя вражду́ и братоуби́йства, но в си́ле Боже́ственныя любве́ и пра́вды, я́коже на Небеси́, и на земли́ да святи́тся и́мя Бо́жие, да бу́дет во́ля Его́ свята́я в челове́цех и да воцари́тся мир и Ца́рствие Бо́жие на земли́. Та́кожде и земно́му оте́честву твоему́, земли́ Росси́йстей, испроси́, уго́дниче Бо́жий, вожделе́ннаго ми́ра и Небе́снаго благослове́ния, во е́же, всемо́щным омофо́ром Ма́тере Бо́жия покрыва́ему, изба́витися ему́ от гла́да, губи́тельства, тру́са, огня́, меча́, наше́ствия иноплеме́нников и междоусо́бныя бра́ни и от всех враг ви́димых и неви́димых, и та́ко же бы́ти ему́ до сконча́ния ве́ка святе́йшему до́му Преблагослове́нныя Богоро́дицы, Креста́ Животворя́щаго си́лою, и в любви́ Бо́жией неоскудева́ему утверди́тися. Нам же всем, во тьму грехо́в погружа́емым, и покая́ния те́пла, ниже́ стра́ха Бо́жия не иму́щим, и си́це безме́рно лю́бящаго нас Го́спода непреста́нно оскорбля́ющим, испроси́, о всеблаже́нне, у Всеще́драго Бо́га на́шего, да Свое́ю всеси́льною благода́тию Боже́ственне посети́т и оживотвори́т ду́ши на́ша и вся́ку зло́бу и го́рдость жите́йскую, уны́ние и нераде́ние в сердца́х на́ших да упраздни́т. Еще́ мо́лимся, о е́же и нам, благода́тию Всесвята́го Ду́ха укрепля́емым и любо́вию Бо́жиею согрева́емым, в человеколю́бии и братолю́бии, смиренному́дрии и моли́твеннем сраспина́нии друг за дру́га и за всех, в пра́вде Бо́жией утверди́тися, и в благода́тней любви́ Бо́жией благонра́вно укрепи́тися, и сынолю́бне Тому́ прибли́житися. Да та́ко, творя́ще Его́ всесвяту́ю во́лю, во вся́ком благоче́стии и чистоте́, вре́меннаго жития́ путь непосты́дно пре́йдем и со все́ми святы́ми Небе́снаго Ца́рствия и Его́ А́гнчаго бра́ка сподо́бимся. Ему́же от всех земны́х и Небе́сных да бу́дет сла́ва, честь и поклоне́ние, со Безнача́льным Его́ Отце́м, Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Молитва 2‑я

О, преди́вный уго́дниче Бо́жий, преподо́бне о́тче Силуа́не, святы́я горы́ Афо́нския но́вый свети́льниче, Пресвято́ю Богоро́дицею возлю́бленный и бы́ти ве́рным де́лателем в Ея́ земне́м вертогра́де призва́нный, со умиле́нием ны́не преклоня́ем коле́на серде́ц на́ших и взыва́ем ти: принеси́ моли́тву на́шу к Всеми́лостивому Бо́гу и испроси́ вся, я́же на по́льзу душа́м и телесе́м на́шим: ве́ру пра́ву, наде́жду несумне́нну, любо́вь нелицеме́рну, во искуше́ниих му́жество, в злострада́ниих и боле́знех терпе́ние, во благоче́стии преспе́яние, в моли́твах усе́рдие; приими́ смире́нное моле́ние на́ше, согре́й нас дыха́нием любве́ твоея́, озари́ нас све́том дарова́нныя тебе́ благода́ти и бу́ди о нас хода́тай ко Го́споду, проле́й к Нему́ моли́тву твою́, да ути́шит бу́рю страсте́й на́ших и хла́дная сердца́ на́ша огне́м Боже́ственныя любве́ своея́ да согре́ет и та́ко сподо́бит нас те́плое покая́ние со слеза́ми Ему́ приноси́ти, труды́ же и ско́рби жития́ сего́ терпели́во, безро́потно и со благодаре́нием понести́, и в час исхо́да на́шего от земна́го жития́, бе́здну грехо́в на́ших в мо́ри милосе́рдия Своего́ да погрузи́т и нас поми́лует ра́ди Своея́ неизрече́нныя любве́ к ро́ду челове́ческому и да сподо́бит в Ца́рствии Небе́снем наслажда́тися Его́ Боже́ственною любо́вию ку́пно с тобо́ю и все́ми святы́ми, во ве́ки веко́в. Ами́нь.

Молитва старца Евстратия Глинского

Го́споди, дай мне дух кро́тости, что́бы быть кро́тким к бли́жним мои́м и возде́ржанным от гне́ва. Да́руй мне дух смиренному́дрия, да́бы не ду́мать о себе́ высоко́ и не горди́ться.

Молитва Ефрема Сирина об умножении любви

Го́споди и Влады́ка живота́ моего́, дух пра́здности, уны́ния, любонача́лия и праздносло́вия не даждь ми. Дух же целому́дрия, смиренному́дрия, терпе́ния и любве́ да́руй ми, рабу́ Твоему́. Ей, Го́споди, Царю́, да́руй ми зре́ти моя́ прегреше́ния и не осужда́ти бра́та моего́, я́ко благослове́н еси́ во ве́ки веко́в. Ами́нь.

Бо́же, очи́сти мя, гре́шнаго (12 раз, с поясными поклонами).

Молитва святого праведного Иоанна Кронштадтского о даровании кротости и смирения в служении ближним

О, кро́ткий и смире́нный се́рдцем Тво́рче, Жизнода́вче, Искупи́телю, Корми́телю и Храни́телю на́ш, Го́споди Иису́се! Научи́ Ты́ на́с любви́, кро́тости и смире́нию Ду́хом Твои́м Святы́м и укрепи́ на́с в си́х достолюбе́знейших Тебе́ доброде́телях, да не надмевают на́шего се́рдца да́ры Твои́ бога́тыя, да ни мни́м мы́, что́ мы́ пита́ем, довольствуем и поддерживаем кого́-ли́бо: Ты́ – о́бщий все́х Кормилец – питаешь, довольствуешь и хранишь; все́ под крыла´ми Твоея́ бла́гости, щедро́т и человеколю́бия дово́льствуются и поко́ятся, а не под на́шими, и́бо мы́ са́ми име́ем ну́жду укрываться в те́ни крыл Твои́х, – ка́ждое мгнове́ние на́шей жи́зни. На́ши о́чи устремлены к Тебе́, Бо́гу на́шему, я́коже о́чи ра́б в руку́ госпо́дий, о́чи рабы́ни в руку́ госпожи́ своея́, до́ндеже уще́дриши на́с. Ами́нь.

Молитва при семейных несогласиях

Милосе́рдный и ми́лостивый Бо́же, возлю́бленный О́тче! Ты по ми́лостивой во́ле Твое́й и Твоему́ Боже́ственному про́мыслу поста́вил нас в состоя́ние свято́го бра́ка, что́бы мы по установле́нию Твоему́ жи́ли в нем. Мы утеша́емся благослове́нием Твои́м, изрече́нным в сло́ве Твое́м, кото́рое говори́т: обре́тший жену́ обре́л бла́го и получи́л благослове́ние от Го́спода. Го́споди Бо́же! Соде́лай, чтоб мы жи́ли друг с дру́гом в Боже́ственном стра́хе Твое́м. Соде́лай та́кже, чтоб жи́ли мы в ми́ре и согла́сии, чтоб в бра́чном состоя́нии на́шем люби́ли целому́дрие и че́стность и не поступа́ли про́тиву их, что́бы в до́ме на́шем обита́ло споко́йствие, и мы сохрани́ли че́стное и́мя. Да́руй нам благода́ть воспита́ть дете́й на́ших в стра́хе и науче́нии к Боже́ственной сла́ве Твое́й, что́бы Ты из уст их возмо́г устро́ить Себе́ хвалу́. Да́руй им послу́шное се́рдце, да бла́го им бу́дет и долголе́тны бу́дут на земле́. Да́руй нам та́кже хлеб насу́щный и благослови́ пита́ние на́ше. Огради́ дом и насле́дие на́ше, что́бы злой враг и его́ ору́дие не могли́ нанести́ им вреда́. И когда́ Ты, Го́споди Бо́же, восхо́щешь насла́ть на нас страда́ния и скорбь, то да́руй нам терпе́ние, что́бы мы послу́шно покоря́лись оте́ческому наказа́нию Твоему́, и поступи́ ми́лостиво с на́ми. Е́сли же мы паде́м, то не отри́нь нас, поддержи́ и сно́ва возста́ви нас. Облегчи́ нам ско́рби на́ши и уте́шь нас, и не оста́вь нас в ну́ждах на́ших. Да́руй нам, что́бы мы не предпочита́ли вре́менного ве́чному, потому́ что мы ничего́ не принесли́ с собо́ю в мир, ничего́ и не вы́несем из него́. Не попусти́ нам прилепля́ться к сребролю́бию, э́тому ко́рню всех злополу́чий, но да стара́емся успева́ть в ве́ре и любви́ и достига́ть ве́чной жи́зни, к кото́рой мы при́званы. Бог Оте́ц да благослови́т и сохрани́т нас. Бог Сын да просвети́т нас све́том Свои́м и да поми́лует нас. Бог Дух Свя́тый да обрати́т к нам лице́ Свое́ и да даст нам мир. Свята́я Тро́ица да охраня́ет вход и исхо́д наш отны́не и во ве́ки. Ами´нь.

Молитвы о даровании детей

Молитва супругов, детей не имущих

Услы́ши нас, Милосе́рдный и Всемогу́щий Бо́же, да моле́нием на́шим ниспо́слана бу́дет благода́ть Твоя́. Будь ми́лостив, Го́споди, к моли́тве на́шей, воспомяни́ зако́н Твой об умноже́нии ро́да челове́ческого и будь ми́лостивым Покрови́телем, да с Твое́ю по́мощью сохрани́тся Тобо́ю же устано́вленное. Ты вла́стною си́лой Твое́ю из ничего́ все сотвори́л и положи́л нача́ло всего́ в ми́ре су́щего; сотвори́л и челове́ка по о́бразу Своему́ и высо́кою та́йною освяти́л сою́з супру́жества в предуказа́ние та́йны едине́ния Христа́ с Це́рковью. Призри́, Милосе́рдный, на рабо́в Твои́х сих (имена), сою́зом супру́жеским соедине́нных и о по́мощи Тя умоля́ющих, да бу́дет на них ми́лость Твоя́, да бу́дут плодови́ты и да уви́дят сынове́й сыно́в свои́х да́же до тре́тьего и четве́ртого ро́да, и до жела́емой ста́рости доживу́т, и войду́т в Ца́рство Небе́сное че́рез Го́спода на́шего Иису́са Христа́, Кото́рому подоба́ет вся́кая сла́ва, честь и поклоне́ние со Святы́м Ду́хом во ве́ки. Ами́нь.

The free sample has ended.